Ilusad karong adlawa ang second season sa Visayas Amateur Athletic Association (VAAA) atol sa press conference nga sugdan sa alas-11:30 sa buntag diha sa Yayoy's Grill and Resto Bar sa barangay Capitol Site, ning siyudad.
Ang kompetisyon sugdan karong Nobiyembre 17 ug 18 diha sa Cebu Coliseum uban sa ML Kwarta Padala nga magbag-o sa ilang tahas isip varsity league's major sponsor.
Si VAAA founder ug Cebu City Councilor Raul 'Yayoy' Alcoseba maoy mangulo sa presscon diin ang liga pormal usab nga modawat sa bag-ong sakop -- University of the Visayas (UV) ug Asian College of Technology (ACT).
Dili pa dugay, ang multi-titled UV Lancers pinaagi ni coach Elmer 'Boy' Cabahug mikompirmar sa ilang partisipasyon sa maong liga nga aduna nay 12 ka mga miyembrong tunghaan.
Gidapit usab sa tigum karong adlawa mao sila si Dioscoro Himotas sa defending champion University of San Jose-Recoletos, Ryan Aznar sa Southwestern University, CebuCity Councilor Rodrigo Abellanosa ug coach Willy Generalao sa ACT, coach Jesus Ramirez sa University of San Carlos ug Engr. Doroteo Salazar sa Salazar Institute of Technology.
Dugang pa niini, ang Silliman University, Foundation University ug ACSAT sa Dumaguete, Bohol Institute of Technology ug Holy Name University sa Tagbilaran City ug ang Western Leyte sa Tacloban City gilauman usab nga mopadala sa ilang mga representante sa maong tigum.
Ang USJ-R Jaguars ubos ni coach Edito Salacut miharos sa SWU Cobras ni coach Alejandrito Miego, 2-0 aron pagdaog sa labing unang titulo sa VAAA sayo ning tuiga.