Patitikman ng San Mig Coffee team ang bagong saltang Pharex kung ano ang kanilang haharapin sa Philippine Basketball League (PBL) sa pagbubukas ng season opener V-Go Extreme Energy Drink Cup ngayon sa The Arena sa San Juan.
Sa pagdating nina NCAA Most Valuable Player (MVP) Kelvin dela Peña at Ateneo stalwart Clifford Arao, ang Coffee Kings na mamanduhan ni coach Koy Banal ay isa na namang title contender sa 2008 season.
Ito ay isang malaking hamon para sa Medics squad na nais makagawa ng pangalan sa PBL na susuportahan ng Gerry’s Grill, ACCEL, Isuzu Motors, Spalding, Gold’s Gym at Xtreme Magic Sing.
Sasandal naman ang Pharex na mamanduhan ni coach Gian Carlo Lai Tan sina Mapua playmaker Sean Co at University of the East big man Elmer Espiritu.
Alas-2:00 ng hapon ang sagupaan ng Pharex at San Mig Coffee pagkatapos ng opening ceremonies sa ala-una ng hapon habang sa ikalawang laro ay maghaharap naman ang Bacchus at ang Toyota Balintawak.
Panauhing pandangal ang mga miyembro ng Special Olympics team sa opening program na ipapakilala ni Commissioner Chino Trinidad habang si San Juan City Mayor JV Ejercito ang magsasagawa ng ceremonial toss. Si incoming chairman Cecilio Pedro ng Hapee Toothpaste ang tagapagsalita. (MBalbuena)