Ang lungsod sa Aloguinsan maoy mo-host sa aksiyon sa Cluster III sa pagpadayon sa 3rd Governor Gwen Garcia Unity Volleyball Cup for Women didto sa Aloguinsan Sports Complex.
Lima ka teams ang nangahas pagsakmit sa cluster title nga naglakip sa Asturias, Balamban, Barili Tuburan ug host-Aloguinsan.
Ang makampiyon makalukat og tiket alang sa cluster championship nga gikatakda sa nanghinapos nga bahin ning tuiga.
Tulo ka duwa ang nagpaabot karon sa host Aloguinsan diin ang unahon nilang harungon mao ang Asturias, sundan sa Tuburan ug dayon ang Barili.
Ang Balamban ug Barili moduwa og tagurha ka duwa. Ang Balamban moduwa sa Barili alang sa ilang unang duwa.
Ugma, ang Asturias moduwa batok sa Balamban sundan kini sa kumbati sa Barili ug Tuburan ug sa Aloguinsan ug Balamban.
Ang Tuburan ug Asturias maoy motak-op sa duwa sa cluster III.
Ang cluster II champion nga Badian ug ang runner-up Oslob kuwalipikado na alang sa cluster championship.