Dili malalis nga daghan na kaayong mga bilyarista sa atong nasud. Kun padaghanay og cue artists maoy hisgutan, dili na mabentahaan ang Pilipinas. Kadaghanan sa mga bilyarista sa atong nasud mga lalaki. Adunay mga babaye nga mibakyaw usab sa ilang tako apan diyutay ra ang ilang populasyon kun itandi sa mga lalaki.
Kun wala ko masayop, ang labing inilang bilyaristang babaye karon sa Pilipinas mao si Rubelin Amit. Si Amit nakasalmot na sa mga internasyonal nga torneyo. Diha gani higayon nga gikauban niya sa pagsalmot og torneyo ang lain pang Pinay cue artist nga si Irish Ranola. Nindot kaayong hunahunaon nga gawas sa mga lalaking bilyarista, aduna na usab kitay babayeng bilyarista sama sa ubang kanasoran. Apan lagi, diyutay ra ang ilang populasyon.
* * *
Niining puntoha, akong nakita nga angay hatagan og prayoridad sa Billiard and Snooker Congress of the Philippines ug sa Corporate Billiards League ang pagpalambo sa billiard sports sa kababayen-an. Ang governing body niining maong matang sa paugnat sa kusog maoy angay maninguha nga makakita'g paagi aron ang ubang kababayen-an nga may katakus sa pagdula og billiard modiskubre sa ilang talento aron madugangan ang gidaghanon sa mga babaye nga mobakyaw sa ilang tako.
Kanunay ko na kining gibalik-balik dinhi, apan sa gihapon akong sublion ang pag-ingon nga ang pagpasiugda og mga torneyo maoy usa sa makapadasig sa mga bilyarista sa pag-concentrate niining matang sa sports nga gisagop nilang Amit ug Ranola. Angay hatagan og prayoridad ang pagpasiugda og mga torneyo sa bilyar nga pagaapilan lang sa mga babaye. Kun kini matigayon, daku ang akong pagtuo nga mosanay ang kaliwat sa mga babayeng bilyarista.
* * *
Nindot man gud kun makabaton ang Pilipinas og daghang babayeng bilyarista kay sa higayon nga adunay internasyonal nga torneyo nga pasiugdahan, aduna na kitay daghang mga alternatibo. Daghan na kita'g kapilian. Mahimong manghashas na lang kita kun kinsay molangkob sa representasyon sa atong nasud nga atong ipadala sa higayon nga may international billiard tournament nga pasiugdahan.
* * *
(Mga sugyot ug pakisayod? Text sa 0910-8105522)