Human sa akong lecture kabahin sa 'sportswriting' atol sa journalism seminar nga gipasiugdahan sa Mandaue City Comprehensive National High School kagahapon sa buntag, mihapit ko sa Mandaue City Sports and Cultural Sports Complex aron pagsaksi sa opening ceremonies sa 3rd Governor Gwen Garcia University Volleyball (GUV) Cup.
Bisan og hapit na mahuman ang programa sa akong pag-abot, nakugang ko sa kabongga sa mga pasundayag ug ingon man sa gipakitang panaghiusa sa mga entranteng koponan diin ang uban mibiyahi pa og kapin sa usa ka gatos ka kilometro aron makatambong sa programa.
Wala nila panumbalinga ang ilang kakapoy, kahago ug sakripisyo aron lamang mahimong tipik sa maong maninungdanong kalihukan. Sulondon kaayo ang gipakita sa mga entrante. Akong pahalipay ug pagdayeg ngadto ni Gobernadora Gwen Garcia ug sa mga kadagkuan sa Cebu Volleyball Association (CEVA) ubos sa liderato ni Glenn Anthony Soco.
* * *
Human sa programa, miduol ko sa akong mga kailang opisyales sa CEVA ug ngadto sa paglamano ni Gob. Gwen. Sa tanto nakong pangita, ako na gyung nasigpatan ang among delegasyon gikan sa Madridejos, ang kinatumyan nga lungsod sa amihanang bahin sa isla sa Bantayan.
Akong gilamano silang SK chairman Owen Daruca ug Sir Nap Calderon, kinsa mao sab ang kasamtangang prinsipal sa Madridejos National High School, nga maoy mibarog nga haligi sa delegasyon.
Kalit nga mi-isa ang akong kilay human mabasa nga sayop ang 'spelling' sa among lungsod. Nakapatik sa ilang uniporme mao ang "Madredijos" imbes nga "Madridejos."
Dili ko katudlo kun kinsay sad-an, ang nagpatahi ba o ang mananahi. Usa pa, masipyat gyud ta kay tawo ra man ta. Ang ako na lang ani Sir Nap ug Owen, palihug ipatahi og balik ang inyong uniporme ug taronga ang spelling sa pangan sa atong lungsod kay lain kaayong tan-awon ug mo-reflect kana sa atong kaugalingon. Dili gani kita makahibalo mo-spelling sa ngan sa atong lungsod, ambot na lang kaha sa uban. Dili ba?
* * *
Basi sa gipanugilon kanato ni trainer Jun Ablaca, lisud matulon ang kaparotan nga nahiaguman ni Alex 'Maasin Bomber' Aroy sa mga kamot ni Zukisani Kwayiba sa ilang WBC International minimumweight title fight kagahapon didto sa Carousel Hotel & Casino, Temba, North-West, South Africa.
Napilde si Aroy pinaagi sa majority decision sa ikaunom nga hugna. Apan matud pa ni Ablaca nga biktima sila sa grabe kaayong panikas nga bisan ako lisud kaayong tuhoan nga nahitabo kining lantaran kaayong panglingla sa mga South African promoters.
Sigun sa gisaysay kanato ni Ablaca pinaagi sa text, ang away nilang Aroy ug Kwayiba gikatakda sa 12 ka hugna, apan naunsa nga gi-undang man kini sa ika-unom nga hugna gumikan kuno sa 'brownout'. Mga madyikero sab diay ning mga South African.
Dominado kaayo ni Aroy ang away gikan sa pagsugod ug gani naluya og maayo si Kwayiba. Apan nakugang si Ablaca kay pagsugod sa ikaunom nga hugna napawong man ang suga sa ring. Dili kini matawag nga brownout gumikan kay nagsiga man ang ubang mga suga sud sa maong casino diin gipahigayon ang away.
Ang mga opisyales sa maong away mihatag sa duha ka boksidor og lima ka minuto aron mopahuway. Nahuman na lang ang gitagana nga oras kanila wala lang gihapon misiga ang suga hinungdan nga nakahukom ang mga fight officials nga kuhaon ang mga scorecards sa judges aron determinahon kinsay daog sa maong away.
Mao na lang ang kahingangha ni Ablaca gumikan kay si Kwayiba man ang gideklara nga mananaog pinaagi sa majority decision.
Grabe kabastos ang gihimo sa promoter sa maong away. Angayan kining kondenahon sa tibuok kalibutan sa boksing ug kinahanglan kining imbestigahon sa kadagkuan sa WBC gumikan kay makamansa sa ilang kredibilidad ug imahe.
* * *
Alang sa inyong mga reaksiyon, mahimong mo-email sa mannix_80@yahoo.com