Salamat sa SMBUna sa tanan, congratulations ngadto nila ni Gandy Valle ug Glendford Autor nga maoy nangharos sa second leg sa 4th San Miguel Beer Philippine 9-Ball Open nga gipahigayon dili pa lang dugay didto sa B3 Bowling Billiards and Bar sa NCCC Mall, Davao City. Hilabihan kangilngig ang performance sa maong mga bilyarista kay wala gayod sila makatilaw og pilde sa katibuk-an sa maong torneyo.
* * *
Angay gyud pasalamatan sa tanang mahigugmaon sa billiard sport ang San Miguel Beer. Kini tungod sa walay puas nga pagsuporta sa maong produkto sa dulang bilyar. May pipila na ka tuig nga ang SMB nagpaluyo sa dagkung kalihukan sa bilyar dinhi sa atong nasud, butang nga gikahingangop og maayo sa mga billiard enthusiasts.
Ang pagpahigayon sa SMB og lain-laing hugna sa torneyo sa lain-laing dapit sa Pilipinas daku kaayo'g gikatabang aron ang atong mga magdudula magpadayon sa madasigon nilang pagbakyaw sa ilang tako. Gawas sa rehiyonal nga torneyo, aduna pa usay Asian 9-Ball tour nga gipasiugdahan ang SMB.
* * *
Karong tuiga, ang San Miguel Beer Philippine 9-Ball Open usa ka joint project sa Puyat Sports, Solar Sports ug sa SMB. Ang first leg niini gipahigayon didto sa Paeng's Skybowl, Robinsons Galleria sa Mandaluyong City ug ang second leg mao kadtong gipahigayon didto sa Davao. Nagtanyag kini'g premyo nga mokabat sa P1,350,000 diin ang mogulang kampiyon makabolsa og P500,000.
Daku na kining tabang ngadto sa atong mga bilyarista. At least, dili magluya ang ilang diwa tungod kay daku man nga kantidad ang at stake niini. Kini makatabang usab aron masustinihan ang kaaktibo sa billiard sports dinhi sa atong nasud.
* * *
Ang grand finals sa nahisgutang torneyo ipahigayon sa Septiyembre 14 ngadto sa 16. Gilauman nga mosalmot niini ang top seeded nga sila si Francisco 'Django' Bustamante, Leonardo 'Dodong' Didal, Mike 'Choke' Takayama, Carlo Biado, Ronato Alcano, Marlon Manalo, Lee Van Corteza, Efren 'Bata' Reyes, Alex 'The Lion' Pagulayan ug Jose 'Amang' Parica.
* * *
(Mga sugyot ug pakisayod? Text sa 0910-8105522)