Ang garbo sa mga Sugbuanon nga si Dondon Hontiveros ug ang San Miguel Beer moanhi dinhi sa Sugbu aron ilang harungon ang Cebu Schools Athletic Foundation, Inc. (CESAFI) All-Stars sa usa ka friendly game nga kabahin sa iyang "Triple Threat Charity Game" karong Septiyembre 2 sa Cebu Coliseum.
Mao kini ang labing unang higayon nga moduwa si Samigue Eman, ang top pick sa San Miguel sa 2007 PBA Draft sa milabay'ng semana.
“Nag-expect gyud ko og nindot kaayong duwa kay kami naa mi Samigue Eman, ang among top pick sa draft, ug ang CESAFI naay Slaughter,” matud pa ni Hontiveros diin ang iyang gipasabot mao si Gregory Fuentes-Slaughter, ang 6’6" Fil-Am sa University of the Visayas (UV) Green Lancers.
Gawas nilang Danny Seigle ug Dorian Peña nga tua pa karon nagbakasyon sa Amerika, si Hontiveros nagkanayon nga ang tibuok tropa sa Beermen mo-anhi aron makigtige batok sa mga bitoon sa CESAFI.
Moduwa uban nilang Hontiveros ug Eman mao sila si Danny Ildefonso, Olsen Racela, LA Tenorio, Wesley Gonzales, Lordy Tugade, Willy Wilson, Larry Fonacier, Jonas Villanueva, Gabby Espinas ug Enrico Villanueva.
“Kaning duwa seguro nga makatabang sa pag-improve sa skills sa mga CESAFI stars. Bisan og gipaboran ming modaog, nindot ni nga challenge namo kay ang CESAFI players maayo man nga mga shooters ug kamao sab mo-press,” matud ni Hontiveros.
Sa pagka karon, si CESAFI commissioner Felix O. Tiukinhoy, Jr. nagkanayon nga magpili pa sila og coach sa CESAFI All-Stars nga maoy motabang kanila pagpanday og usa ka lig-ong team nga makahatag og maayong duwa batok sa Beermen.
Nagplano si Hontiveros nga gamiton ang ilang makita sa maong duwa paghatag og scholarship grants ngadto sa mga kabus apan takus nga mga estudyante.