Mitukob sa ilang ikatulong sunod-sunod nga kadaugan ang Southwestern University (SWU) Cobras pinaagi sa paglubong sa Don Bosco Technology Center (DBTC) Greywolves sa iskor nga 79-53 sa nagpadayong aksiyon sa Cebu Schools Athletic Foundation, Inc. (CESAFI) basketball tournament kagahapon diha sa New Cebu Coliseum.
Nagtangag og 3-0 win-loss record, ang Cobras nagtabla na karon uban sa haring gangis University of the Visayas (UV) Green Lancers aron sa pagpangulo sa liderato, samtang ang Greywolves pabilin pang nagpahipi sa kangitngit ug nangandoy og kadaugan.
Sila si Jerus Ceniza ug Eleazar Armecin maoy misiaw og maayo sa Cobras nga nagkumboya og 23 puntos. Si Ceniza mikandos og 13 puntos, samtang si Armecin mibugwal og 10 puntos alang sa Cobras, kinsa nakapanimaho sa ilang kadaugan human kini milabaw og 26 puntos sa iskor nga 79-53 sa nahabiling 18 segundos sa duwa.
Si Eric Zanoria mitampo og 17 puntos, samtang ang ilang sinaligan nga si Litorja mitunol og 14 puntos.
Wala kapugngi ang pagkisikisi sa Cobras gumikan kay anaa nila pabor ang tempo gikan pa sa pagsugod sa duwa hinungdan sa ilang pag-abante og 16 puntos, 41-25 paghuman sa first half.
Si Ian Calooy, kinsa mao ray bugtong player sa Greywolves nga nakakuha og double figures maoy nangulo sa pilderong koponan. Si Calooy milansang og 14 puntos, apan wala kini makakuha og suporta gikan sa iyang kaubanan nga maoy nakaingon sa ilang pagkapukan.