Gisakyan og buynas ang Team Tribu Guardo sa second half hinungdan nga ilang naligsan ang Jushua, 94-82 sa ilang friendly match didto sa Pardo Sports Complex.
Unang mibuga og mga puntos ang Tribu Guardo sa pagbukas gyud sa duwa, apan kalit lang mikagar ang ilang mga tirada sa ikaduhang kuwarter hinungdan nga nakasikit ang Jushua sa iskor nga 48-50 human sa unang-tunga.
Human sa halftime, ang Tribu Guardo milagsik og balik aron pagpatul-id og balik sa labaw ngadto sa double-digit, 75-65, dayong sulod sa katapusang 10 minutos sa duwa.
Gipahugtan pa gyod sa Tribu Guardo ang ilang depensa aron pagpanalipod sa ilang labaw sa naghinapos nga bahin sa duwa nga maoy nakapaluya sa Jushua.
Si Rene Toring maoy nangulo sa Tribu Guardo nga adunay 24 puntos, gisundan ni team owner ug sports patron Jonathan 'Atan' L Guardo nga adunay 16 puntos. Niamot sab si Cogon-Pardo Brgy. Capt. Danny Lim og 12 puntos, samtang ang kanhi konsehal sa Cebu City nga si Eugenio 'Jun' Gabuya mitampo og kuwatro puntos.