Si Rev "The Gentle Giant" Santillan sa RWS Stable mi-angkon og balik sa iyang Oriental and Pacific Boxing Federation (OPBF) welterweight title human gipalukapa niini ang kanhi Hapon nga kampiyon nga si Taesei Marumoto sa ikaunom nga hugna sa miaging gabii didto sa Archaic Hall sa Amagasaki, Hyogo, Japan.
"Nindot kaayo ang away ni Santillan. Karon pa ko kakita niya nga ingon ato ang iyang kondisyon," matud pa sa notadong Sugbuanong promoter nga si Rex "Wakee" Salud agig pagdayeg sa impresibong duwa ni Santillan.
Si Salud, nga milarga sa Japan aron mo-abiba sa iyang manok, nagkanayon nga usa lamang ka suntok ni Santillan ang nakapatay-og sa Hapon. Si Santillan mibuhi og makusog nga left hook ngadto sa apapangig nga maoy nakapatukay-ang ni Marumoto sa hingpit sa oras nga 2:12 sa ikaunom nga hugna.
Mao kadto ang ikatulong higayon nga gilangkat og balik niini Santillan ang korona nga orihinal niyang gilabni human gipukan ang Koreanong si Suk-Hyun Yun pinaagi sa split decision niadtong Enero 26, 2001 diha sa Waterfront Cebu City Hotel and Casino.
Si Santillan nagbitbit na karon og 24-3-1 win-loss record nga gidayan-dayanan og 17KOs, samtang si Marumoto nadakin-as ngadto sa 20-8-1 uban ang 9KOs.
Si Salud, nga gikatakdang mobalik sa Sugbu ugmang adlawa, mipasalig nga iyang lihokon og maayo aron anhi mahitabo sa Sugbu ang depensa ni Santillan, kansang abilidad taud-taud na sab nga wala igkita sa mga Sugbuanon niyang mga dumadapig.