Dul-an sa 100 ka mga entrante ang mag-ilog sa kampiyonato sa 1st Deutrium Chess Challenge nga mosikad karong adlawa diha sa Colonnade Mall sa may dalan Colon ning dakbayan. Ang Deutrium, nga maoy labing unang chess engine sa Pilipinas nga adunay ELO rating nga 2200, mosalmot sa maong duha ka adlaw nga torneyo.
Ang makampiyon sa maong 7-round Swiss system nga kompetisyon mobulsa og P4,000, samtang ang mopahiluna sa ikaduha ug ikatulong dapit mobitbit og P3,000 ug P2,000. Ang motapos gikan sa ikaupat hangtud sa ika-10 nga puwesto modawat og P1,500, P1,000, P900, P800, P700, P600 ug P500.
Duna say insentibo nga madawat ang mga players nga iparang sa Deutrium - P200 kon makadaog, P100 kon makatabla ug P50 kon mapilde.
Gawas niini, dunay say appearance fees nga ipangapud-apud. P1,000 alang sa International ug FIDE Masters ug P500 sa National Masters.
Ang nag-ong tulo ka batan-ong players hatagan og libreng kopya sa New In Chess nga magasin.
Mopadagan sa maong torneyo mao sila si Colonnade Chess Club supervisor Lito Pielago, international arbiter Marvin Ruelan ug tournament director Edmund Suralta.