Dali ra nga nakabawi ang Heart Vit-Red sa miagi nilang kaparotan dihang ilang gipilde ang Gian Sportswear, 104-92, sa 30-above division sa Punta Princesa Sports Association (PPSA) 2007 Summer Basketball League diha sa Don Vicente Sotto Memorial Gym sa Brgy. Punta Princesa, ning siyudad.
Balansi kaayo ang opensa sa Heart Vit-Red diin unom sa ilang mga magduduwa ang miposte og double figures alang sa ilang ikaupat ka kadaugan.
Si Jovan Bulado maoy topscorer sa maong kadaugan nga mibugha og 24 puntos, gisundan ni Julius Gastador nga adunay 17 puntos. Si Rene Toring miamot og 16 puntos, si Resty Getubig mitampo og 15 puntos, si Benjie Tomaquin mitampo og 14 puntos ug si Lozano adunay 10 puntos.
Sa inter-village action, ang AMBL ni Allan Lim miinat sa ilang baraha ngadto sa 2-1 human nila gipilde ang Dacey & Dolly, 108-97.