Dewfoam gilihian og daog, Arthro nakabawi

Ang Dewfoam-sponsored University of San Carlos (USC) men''s team nagmadaugon sa una nilang duwa, samtang ang Arthro Kontra Arthritis-backed University of Southern Philippines-Foundation (USP-F) nakabawi sa miagi nilang kapildihan sa women''s division sa 1st M. Lhuillier Kwarta Padala Open Indoor Volleyball Tournament niadtong Domingo diha sa Aznar Coliseum.

Ang Dewfoam-USC ni coach Eugene de la Cerna ug Dewey Choachuy, ang reigning men''s champion sa Cebu Schools Athletic Foundation, Inc. (CESAFI), natakilpo sa unang set, 22-25, apan giharos nila og daog ang sunod nga tulo ka sets aron pagpatikangkang sa Tinong''s Bakery-Mandaue Selection, 25-18, 28-26, 25-19.

Wala sab magpabitin ang Arthro Kontra Arthritis-USP-F ni coach Jordan Paca ug businessman Jonathan ''Atan'' L. Guardo nga yano ra kaayong mipukan sa Rich Media Digital Ads-USC, 25-18, 25-8, 25-9 aron pagsakmit sa una nilang daog sa women''s category.

Sa laing engkuwentro sa men''s division, ang ML Cebu Dried Mango Delights/USJ-R ni coach Grace Antigua mipatilaw sa The Classical Touch ni Alan Choachuy sa ikaduha niining sunod-sunod nga kaparotan, 25-20, 25-14, 25-23.

Mobalik ang aksiyon ning duha ka bulan nga torneyo nga gitukod ni M. Lhuillier Sports Development Foundation (MLSDF) executive director Eddie B. Ybañez karong Domingo diha sa University of the Visayas (UV) Gym.