Mao kini ang nasayran atol sa organizational meeting nga gipatawag ni event organizer ug MLSDF executive director Eddie Ybañez sa miaging gabii diha sa Family Choice Restaurant.
Lakip sa mga coaches nga mipadayag sa ilang interes nga mobanat sa kompetisyon mao sila si Thelma P. Datig sa Southwestern University, Grace M. Antigua sa University of San Jose-Recoletos, Raffy Briones sa University of the Visayas, Norvie Labuga sa University of San Carlos, Jordan Paca sa University of Southern Philippines Foundation, Mechell Matuguina sa JMM ug Kenneth Cinco sa Hiroshi.
Sa maong panagtigum, gikauyonan sa tanan nga ang torneyo kinahanglan nga i-sanction kon adunay pagtugot sa Cebu Volleyball Association ubos sa liderato ni Glen Anthony Soco gumikan kay ang CEVA mao man ang tigpasiugda sa mga kalihukan sa volleyball dinhi sa probinsiya.
Ang torneyo magsubay og single round robin format sa eliminasyon diin ang top four teams mo-abante sa semifinals.
Ang top seed makigharong batok sa second-ranked team alang sa kampiyonato diin ang mananaog modawat og P5,000. Ang No. 3 ug No. 4 teams maoy magsangka alang sa ikatulong puwesto.
Ang motapos sa ikaduhang dapit mobitbit og P3,000, samtang ang mopahiluna sa ikatulo ug ikaupat nga dapit mobulsa og P1,500 ug P1,000.
Ang registration nagkantidad og P500 matag team. Ang deadline pagduso sa line ups gitakda karong Pebrero 6 atol sa final meeting diha sa White Gold House Restaurant.
Alang sa dugang detalye, niadtong mga interesado mahimong motawag ni Ybañez sa (032)255-4423 o dili ba sa 0926-7319004.