Posibleng dili ma-'unity congress'

Usa sa mahinungdanong yawi aron masulbad na ang kagubot sa basketbol dinhi sa Pilipinas mao ang "Unity Congress" nga gikatakda karong Pebrero 5 didto sa Dusit Hotel sa kaulohan. Gipasiugdahan kini sa Samahang Basketbol ng Pilipinas (SBP) ubos sa inisyatiba nilang Manny V. Pangilinan ug Sen. Jinggoy Estrada.

Laraw sa maong kongreso nga hiusahon ang tanang grupo sa basketbol sa nasud aron makaporma og usa ka bag-o ug hiniusang basketball organization nga gikinahanglan aron libkason sa International Basketball Federation (FIBA) ang suspensiyon nga gipahamtang niini sa Pilipinas.

* * *

Duha ka semana ang milabay, sila si Pangilinan, Estrada ug PBA commissioner Noli Eala niadto sa Geneva, Switzerland aron kumbinsihon ang kadagkuan sa FIBA nga wagtangon na niini ang suspensiyon sa Pilipinas.

Matud sa maong grupo nga positibo ug mabungahon ang ilang pakigkita nilang FIBA president Bon Elphinston ug secretary-general Patrick Baumann diin ila kining gipahibawo kabahin sa kasamtangan nga kahimtang sa basketbol sa nasud ug ingon man sa umaabot nilang mga programa.

Apan silang Pangilinan ug kaubanan mipauli nga way dalang konkreto balita nga nakapamatuod nga ang FIBA misangon sa ilang hangyo nga libkason niini ang suspensiyon sa Pilipinas.

* * *

Human sa ilang meeting, ang FIBA ug ang SBP nagka-uyon nga ang labing maayong paagi paghiusa sa Philippine basketball mao ang pagsangon ug pagkompleto sa mga kondisyon nga nalatid sa Tokyo Agreement. Gani gipahinumduman sila ni Baumann nga kinahanglan nga ilang sundon unsay nahisulat sa Tokyo Communique gumikan kay mao man kini ang dunay pagsugot gikan sa FIBA Central Board.

Unsa man kining kasabotan? Mao kini ang gipirmahan sa Pilipinas Basketball ug Basketball Association of the Philippines (BAP) sa bulan sa Agosto sa miaging tuig didto sa Japan nga ilang gisumiter sa FIBA.

Matud pa ni Baumann nga ang FIBA hangtud karon nagtamod sa maong kasabotan diin ang PB ug BAP mipasalig nga magtambayayong sila pagpangita og epektibong pamaagi aron hiusaon ang tanang basketball stakeholders sa nasud.

Nan unsaon na lang kini karon kay nagmagahi man ang BAP pagsuporta sa mga tinguha ug laraw sa SBP. Kon dili moabag ang BAP sa ilang mga lakang, sa tan-aw nako way mahimo ang SBP.

Kini gumikan kay bisan pa sa pagpamakwit sa pipila niini ka mga opisyales, ang BAP nagpabiling gamhanan ug hangtud karon humot pa kaayo kini sa FIBA. Kon way presensiya sa BAP, lagmit dili kini mamahimong usa ka "Unity Congress" sigun sa gitinguha sa SBP.

Og kon ugaling way liderato sa BAP nga mobutho sa "Unity Congress", duna pa kahay kasulbaran kining gusot sa RP basketball? Mao kini ang mabug-at nga tahas nga pas-anon sa SBP.

* * *

PERSONAL NOTES: Belated happy birthday sa akong higala diha sa Sitio Manggahan sa Brgy. Punta Princesa nga si Nigel Galvez, kinsa nagsaulog sa adlaw niyang natawhan niadtong Enero 27 ug ingon man sa akong maguwang nga si Hilary Anthony nga mipakli og laing panid sa iyang kinabuhi kagahapong adlawa. Cheers kaninyong duha ug hinaut nga magbungahon ang umaabot nga mga tuig nga inyong latason ning kalibutana.

* * *

Alang sa inyong mga reaksiyon, mahimong mo e-mail sa mannix_80@yahoo.com