Bisan sa sayong pagpangataki sa ilang mga kaatbang gikan sa nagkadaiyang mga dapit, ang mga banggiitan sa Sugbu nipakita sab sa ilang kabangis human ilang giangkon ang top 20 sa ikaduhang adlaw ning upat ka adlaw nga torneyo nga nagtangag og P200,000 ganting salapi.
Nabiktima ni Sia si Edmund Gatus atol sa ilang engkwentro, uban nilang NM Mirabeau Maga, NM Levi Mercado, Ravel Canlas, NM Emmanuel Senador ug IM Chito Garma nga nipundo 3.0 puntos matag usa.
Si Maga nibuntog ni Ferdinand Leysa, si Mercado nipalayas ni Carlo Magno Rosaupan, nidaog sab si Canlas batok ni Elias Lao Jr.
Wala sab magpaulahi si Senador kinsa nipukan ni Eden Diano ug si Garma nipukan ni Christopher Castellano.
Ang garbo sa Sugbo nga si kanhi non-smoker champion ug two-time Mandaue Open title-holder Carlos Moreno III nipahiluna sa ikapitong dapit sa iyang 2.5 puntos.
Lain pang mga Sugbuanon nga kinsa nakaposte og 2.5 puntos mao silang Rex Androe Cabuncal, Kim Steven Yap, Mark Mangubat, Mario Mangubat ug Rhobel Legaspi.
Lain pang nakakuha og 2.5 puntos mao sila si NM Wilfredo Neri, NM Efren Magamasbad, NM Rustum Tolentino, Dr. Jenny Mayor, IM Ronald Bancod ug IM Barlo Nadera.
Ang maong torneyo gipaluyohan ni Surigao Rep. Prospero 'Butch' Pichay ug Rose Pharmacy Inc.
Ang makampiyon ning maong National Chess Federation of the Philippines (NCFP)-sanctioned event mobulsa og P50,000 paycheck, ang mopahiluna sa ikaduha makadawat og P30,000 ug ang ikatulo hatagan og P20,000.
Mopahiluna sa ikaupat nga dapit makadawat og P10,000, samtang ang fifth hangtod 10th placers makadawat og P5,000 matag usa.
Pahalipayan sab og P3,000 ang mopahiluna gikan sa ika-11 ngadto sa ika-20 nga dapit.