Sumandig ang Comets sa mga balikat ni Ronjay Buenafe sa huling dalawang minuto ng laro upang igupo ang Moneymen sa double overtime, 95-90, sa eliminasyon ng 2006 PBL Silver Cup sa UST Gym.
Ang naturang panalo ng Mail & More, nakakolekta ng 21 puntos, 14 rebounds, 3 shotblocks at 2 assists kay 6-foot-6 JR Quiñahan, ang naghanay sa kanila sa Hapee-PCU at Sista Super Sealants sa liderato mula sa magkakatulad nilang 5-2 kartada.
Muntik nang mauwi sa wala ang ipinosteng 22-point lead, 55-33, ng Comets sa 4:15 ng third period nang agawin ng Moneymen, may 2-4 rekord ngayon kasama ang tatlong dikit na kabiguan, ang unahan sa 73-69 sa huling 1:35 ng fourth quarter.
Ang basket ni Jorell Canizares at dalawang freethrows ni Mike Bravo ang nagtulak sa Mail & More sa unang overtime, 73-73, bago ang follow-up ni Elmer Espiritu sa pagtunog ng buzzer para sa ikalawang extension period, 82-82.
Huling nakalapit ang Cebuana Lhuillier sa 83-84 buhat sa split ni Mark Abadia, humugot ng 12 marka sa fourth period, sa ilalim ng 3:00 ng labanan bago naiwanan sa 83-89 sa 2:04 nito mula sa isang tres at drive ni Buenafe.
Matapos ang split ni Ken Bono para sa 88-93 agwat ng Moneymen sa huling 38 segundo, dalawang freethrows naman ang isinalpak ni Marvin Yambao sa natitirang 23.1 tikada para ibigay sa Comets ang 95-88 lamang. (RCADAYONA)