Sa opener, ang Santa Fe nagsalig sa abilidad sa ilang varsity players gikan sa Southwestern University ug University of Cebu aron paglubong sa Bantayan, 25-6, 25-9.
Gipukan sab sa Santa Fe ang Madridejos aron pag-angkon sa ikaduhang daog sud gihapon sa duha ka hugna, 25-14, 25-15.
Hinuon, human sa ilang kaparotan batok sa Santa Fe, ang Madridejos nakabawi sa ilang katapusang duwa pinaagi sa pagpukan sa Bantayan, 25-23, 25-12.
Naghari ang Santa Fe sa sub-cluster human kini makahakot og duha ka sunod-sunod nga daog batok sa Bantayan ug Madridejos.
Ang Santa Fe manulong karong adlawa alang sa laing kumbati batok sa midaog sa duwa tali sa Medellin, San Remigio ug Tabogon aron pag-ila sa kampiyon sa Cluster IV.
Pasiunang duwa karong adlawa mao ang Tabogon ug San Remigio sa alas-10:00 sa buntag ug ang modaog sa maong duwa maoy moharong sa Medellin sa ikaduhang duwa.
Sa hapon, ang mapilde sa game one mao usab ang moharong sa Medellin.
Ang team nga adunay daghan og daog maoy moaway sa kampiyonato batok sa Santa Fe didto sa Medellin Sports Complex.
Ang top two placers sa Cluster IV makakuha og tiket alang sa finals sa Mandaue uban sa Talisay ug Minglanilla sa Cluster I, Badian ug Boljoon sa Cluster II, ingon man ang Toledo ug Balamban sa Cluster III.