Kun ang dula himuong career

Kun gusto kang itingob ang imong panahon ngadto sa pagdula og billiard, nagpasabot kini nga wala ka nay higayon sa pag-atiman sa laing mga butang. Imo nang ihalad ang tanan nimong panahon ngadto sa dula nga imong gikahiligan. Unsaon na man lang ang imong panginabuhi?

Dili mahimong magpunay ka lang og dula bisan nagkutoy na ang imong tiyan. Mao nga kinahanglang manginabuhi ka usab. Apan kun gusto kang matingob gayod ang imong panahon alang sa billiard sport, mas maayo pa nga himuon mo kining career. Modula ka niini dili isip usa ka leisure kondili isip usa ka tinubdan sa panginabuhi aron kahatagan og mas bug-at nga kahulogan ang imong pagdula.

Matud pa ni Glenn Bond, usa sa mga respetadong kolumnista sa billiard website nga Azbilliards.com, kinahanglan nga hatagan sa magdudula og definition ang iyang pagdula kun gusto siya nga mahimo kining mahinungdanong kabahin sa iyang kinabuhi. Buot ipasabot ni Bond nga angay gayod seryosohon ang pagdula aron imong makita ang dakung kapuslanan niini sa imong kinabuhi.

* * *

Laing kolumnista sa Azbilliards.com nga si Kim Shaw miingon nga ang usa ka magdudula nga matinud-anong nagmahal sa iyang sport andam nga magsakripisyo alang niini. Gi-establisar man gud ni Shaw nga ang pagkat-on sa dulang billiard usa ka makuti nga proseso. Walay magdudula nga nahimong maayong laki diha-diha. Miagi silang tanan sa makuting pagbansay hangtod nga sila nahanas.

Ang tanang mga magdudula moagi niining maong proseso. Ang pagpanglaktod posibleng mosangko sa kapakyasan. Apan ang pagpailawom sa proseso maoy mapainubsanong pagtahan sa kaugalingon aron madisiplina ug makakat-on. Kini ang gikinahanglan sa tanang mga magdudula, professional man ug amateur. Nasinati kini nila ni Efren 'Bata' Reyes, Francisco 'Django' Bustamante, Alex 'The Lion' Pagulayan, Lee Van Corteza, Gande Valle, Dennis Orcullo ug daghan pang uban.

* * *

Kun naghangad ka sa ilang kahabog karon ug gustong makaabot sa ilang nahimutangan, kinahanglang mosubay ka sa proseso nga ilang giagian. Kinahanglan nga moagi ka sa dalan nga ilang gibaktas. Kay ang ilang tumong mao ang imong tumong busa kinahanglang mosubay ka sa samang dalan nga ilang giagian.

Midugang sila si Shaw ug Bond nga ang dedikasyon gikinahanglan sa magdudula kun gusto niyang mouswag ang iyang performance sa dula. Nagpasabot kini og paggahin og dakung panahon alang sa dula diha sa pagbansay. Kay lagi, importante kaayo ang regular practice session. Dili gayod nako kalimtan ang paghisgot niini kay usa kini ka mahinungdanong kabahin sa career sa usa ka bilyarista.

Gikinahanglan ang pailob diha sa pagbansay. Labaw sa tanan, kinahanglan nga ang magdudula maantigong mosakripisyo. Sa higayon nga itingob niya ang iyang panahon sa dula, aduna gayoy mga butang nga iyang mapasagdan.

* * *

(Mga sugyot ug pakisayod? Text sa 0910-8105522)