Ang agent ni Singson nga si Danny Espiritu mibutyag sa Banat News nga namugna ang maong kasabotan human sa iyang pakighimamat ni Alaska head coach Tim Cone atol sa team practice sa Aces sa miaging adlaw.
Matud pa ni Espiritu nga si Singson magdawatan og P125,000 matag bulan.
"Singson has agreed to a one-year contract with Alaska. He will receive a monthly salary of P125,000," matud ni Espiritu. "We didn't sign anything yet, but coach Tim Cone assured that Singson will definitely be given a contract at the soonest possible time."
Ang Aces nanginahanglan og maayong point guard gumikan si Mike Cortez nakaangkon og ACL injury sa ilang 92-98 nga kapildihan batok sa Sta. Lucia Realtors niadtong Oktubre 14 didto sa The Arena sa San Juan.
Si Cortez gikatahong dili makaduwa sud sa unom ka bulan.
Nagkanayon si Espiritu nga upat ka players ang iyang girekomendar sa Alaska, apan si Singson maoy natipohan ni Cone. Ang laing tulo mao ang Sugbuanon nga sila si Gilbert Demape ug Jimwell Torion, samtang ang ikatulo mao si Egay Echavez nga lumad nga taga Zamboanga.
Si Alaska assistant coach Luigi Trillo nagtuo nga si Singson daku og ikatabang sa ilang koponan.
"Signing up Singson is a must for us because we don't have a legitimate point guard. He's an excellent playmaker and I'm sure he will make a strong addition to our team," matud pa ni Trillo.
Ang Alaska maoy ikaupat nga team nga duwaan ni Singson sa PBA.
Ang Mandauehanong basketbolista nakaduwa uban sa San Miguel Beer, Shell Turbo Chargers ug Coca-Cola Tigers sa duha ka tuig niining panimpad sa PBA.
Human mapupos iyang kontrata sa Coke, si Singson miduwa sa Cebu Landmasters-Mantawi sa Mindanao Visayas Basketball Association (MVBA) diin siya maoy nangu sa ilang 83-79 nga kadaugan batok sa M. Lhuillier Jewelers niadtong Oktubre 19 diha sa Mandaue.