Ang 24-anyos nga si Suico unang mipayaka ni Chuwatana pinaagi sa pagpatama sa iyang solid right uppercut sa suwang sa bisitang boksidor sa ikaupat nga hugna. Hinuon, si Chuwatana dali nga nakabangon, apan ang bangis nga si Suico mipaluhod pag-usab sa iyang kaatbang ug naglisod kini pagbarog hinungdan nga gihunong ni referee Bruce Mac Tavish ang away sa nakaon nga 2:06 sa fourth round aron paglikay sa nahagba nga boksidor sa kadaut.
Sa wala pa pahunonga si Chuwatana, si Suico adunay pipila ka mga defensive lapses sa ikaduhang hugna, abli ug wala kaayo niya depensahe ang iyang nawong hinungdan nga nakataghap ang Thai boxer pagpasulod sa iyang kusog nga kumo.
Sa katapusang 10 segundos sa maong hugna, nausab ang templada sa lihok ni Suico diin iyang gidaro ang nag-asoaso nga mga kinumo ni Chuwatana hinungdan sa pagkagisi sa walang bahin sa mata niini.
Gikan niadto, wala na makaugpo pa si Chuwatana kay gilumsan na kini sa nagpungasi nga mga kumo ni Suico.
Si Suico, nga karon nakabalik og away sa iyang tagilungsod sud sa 18 ka buwan, nagbitbit na karon og 25-3 win-loss uban ang 23KOs.
Samtang si Chuwatana nakaangkon og 15 ka pilde batok sa siyam ka daog, diin pito sa iyang mga daog pinaagi sa knockouts.
Ang Japanese manager ni Suico nga si Joe Koizumi, mitug-an nga ang iyang boksidor modepensa sa labing unang higayon sa titulo unya sa Pebrero sunod tuig didto sa Japan.
Sa supporting main event, si Eden Sonsona sa Wild Card Stable sa Manila nagpabiling hari sa Philippine super flyweight human sa iyang kadaugan pinaagi sa ninth round TKO batok ni Jerope Mercado sa RWS Stable.
Si Sonsona mipayaka ni Mercado pinaagi sa iyang right cross, giusban kini pinaagi sa pagpatama sa naghaguros niyang left hook sa oras nga 1:22 sa ikasiyam nga hugna.
Sa maong kadaugan, si Sonsona miinat sa iyang walay buling nga baraha nga 10-0 uban ang 2KOs.
Sa laing aksiyon, ang managsuong Apol ug Benedict Suico, mas impresibo pa itandi sa ilang uyoan nga si Randy.
Si Randy nagkinahanglan lamang og dos minutos ug 51 segundos aron pagtumba ni Jun Pader, samtang si Benedict mipakamang ni Edwin Ubatay sa oras nga 2:05 sa ikaduhang hugna.
Ang ubang mga away ning maong promosyon nga gipasiugdahan sa Rex 'Wakee' Salud International uban sa abag sa MP Promotions, si Boggie Delada nidaog pinaagi sa first round TKO batok ni Mario de Asis, nidaog sab si Gedion Amba pinaagi sa unanimous decision batok ni Rolly Mandahinog ug si Darrel Pucdol mitumba ni Reymund Arguedo sud lamang sa ikaduhang round.