"Nagsige ni og training ang akong mga boxers ug silang tanan maayo kaayo ang kondisyon. Taas kaayo ang akong kompiyansa sa ilaha nga ilang dag-on ang overall title," matud pa ni Cuizon.
Mangulo sa kampanya sa MLSDF-Cebu City mao sila si Jojo Ouano (42 kgs.) ug Joseph Von Miñoza (61 kgs.) nga pulos gold medallist sa National Youth Open Amateur Boxing Championships upat na ka tuig ang milabay didto sa dakbayan sa Tagbilaran.
Mokompleto sa lineup sa MLSDF-Cebu City mao sila si Eddie Boy Aviar (39 kgs.), KJ Pelayo (32 kgs.), Gerald Suico, Norberto Taño (44 kgs.), Edcel Tuñacao (46 kgs.) ug Marjohn Yap (48 kgs.)
Gawas sa host Gensan, ang MLSDF-Cebu City boxers seguradong mag-atubang og malisud nga hagit sa laing entrante gikan sa Sugbu, ang RWS Stable sa notadong promoter nga si Rex 'Wakee' Salud nga mao sab ang consultant ni boxing superstar ug idolo sa Gensan nga si Manny Pacquiao.
Lain pang mga partisipante mao ang mga boksidor gikan sa Bacolod, Panabo, North ug South Cotabato, Davao, Maramag ug Malaybalay (Bukidnon), Aklan, Zamboanga del Norte ni Bullet Jalosjos ug Saranggani Province.
Ang mga miyembro sa Cebu City boxing team mogikan paingon sa Gensan agi sa Cagayan de Oro ugma sa gabii.
Si MLSDF executive director Eddie Ybañez, nga maoy mi-abaga sa tanan nilang galastohon sa maong upat ka adlaw nga binakbakay, mo-apas karong Sabado.