Pipeline gilubong sa Big Three

Ang Big Three walay kukaluoy nga milubong sa Pipeline Resto Bar sa iskor nga 115-83, aron pag-angkon sa liderato sa Atan Guardo basketball tournament diha sa Vicente Sotto Gym sa Brgy. Punta Princesa, ning siyudad.

Pito ka magduduwa sa Big Three ang niposte og double figures nga gipangulohan ni Richie Lahoylahoy, kinsa ni-iskor og 21 puntos nga pulos iyang naigo sa second half.

Si Jess Sala nidugang og 10 puntos lakip na niini ang tulo ka 3-point sa katapusang kuwarter, samtang ang managsuong Toking ug Titing Perez, Eking Pacaña, Ting Bacalla ug Bernard Campomanes nagkumboya og 58 puntos.

Si Bunny Tecson nipupo og 13 puntos alang sa pilderong Pipeline.

Sa laing duwa, ang Frontel ni Jay-ar Reynes nipatikangkang sa Sanalva, 82-65, aron pag-inat sa ilang baraha, 2-2.

Si Joel Aguillon maoy nangulo sa Frontel sa iyang 20 puntos, samtang silang Ruel Gallardo, Alvin Puno ug Esmie Herbito niamot og 10 puntos matag usa.

Silang Jeffrey Basallo ug Emy Marquez nga nagkumboya og 30 puntos maoy nangulo sa Sanalva.