Orcullo versus Alcano sa RP 9-Ball Open semis

Sumandal si Dennis Orcullo sa kritikal na error ni Ramil Gallego sa huling bahagi ng labanan upang hatakin ang 9-7 victory at ipuwersa ang semifinal duel laban sa mainit na si Ronnie Alcano sa Philippine 9-Ball Open na ginaganap sa Robinson’s Galleria Trade Hall.

Tabla ang iskor sa 7-all, handa na si Gallego na tapusin ang 15th frame matapos lusutan ang mahirap na spin shot sa one-ball.

Ngunit nagmintis si Gallego sa simpleng cut-shot sa blue na nagbigay ng pagkakataon kay Orcullo na siyang umubos ng bola sa lamesa tungo sa kanyang tagumpay.

Hindi na rin pinakawalan ni Orcullo ang pag-pagkakataon sa 16th frame na kanyang isinubi upang itakda ang pakikipagharap kay Alcano.

"Mabuti na lang bumenta ‘yung uno nung huling sargo ko," ani Orcullo na nanalo rin kay Gallego noong nakaraang taon. "Mahirap kasing pabalikin pa sa me-sa si Bebeng (Gallego)."