At noong hapon ding ‘yun, mas maganda ang inilaban ni Tanamor kaysa sa kasalukuyang Pinoy ring idol.
Nagpamalas ang 25 anyos na ipinagmamalaking anak ng Zamboanga City ng impresibong panalo kontra kay Abdraimov Nurlan ng Kazakhstan upang lumapit sa pagkuha ng tiket sa Athens Olympics.
Umiskor ng Referee-Stopped-Contest Out-scored (RSCO-III) si Tanamor para sa natatanging Pinoy na umusad sa semifinals ng 3rd Asian Olympic qualifying boxing tournament (Green Hill Cup) matapos na yumuko si Genebert Basadre sa Malaysian boxer na si Adnan Yusoh, 24-15 sa kanilang 60 kg. quarterfinal bout noong Linggo sa KPT Sports Complex.
Mabilis sa kanyang kamao, binugbog ni Vietnam Southeast Asian Games gold medalist Tanamor ang matipunong Kazakh sa pamamagitan ng mga kombinasyon sa ulo at katawan ng matatalim na suntok.
Tinapos ng Pinoy ang kanyang impresibong performance sa 48 kg. nang pabagsakin niya si Nurlan sa pamamagitan ng solidong left straight para sa standing 8 count sa kalagitnaan ng ikatlong round.
Ilang segundo lang ang nagdaan tapos na ang laban.
"Isa na lang. Pipilitin po nating makuha," pangako ng soft spoken Zamboangueño.
Nakatakda ang pinakaimportanteng laban ni Tanamor kay Namajo-nov Otabek ng Uzbekistan sa Martes. Dinispatsa ni Otabek ang Mongolian boxer na si Zorigt Bator, 35-22 sa round-of-8.
Di tulad ni Tanamor, hindi naipakita ni Basadre ang kanyang dominasyon kontra kay Yusoh, SEA Games at Common-wealth Games gold medalist, nang mangapa ito sa unang dalawang round.
Ang batang taga-Cagayan de Oro ay nagpakita ng husay sa final two rounds ngunit mas mahusay pa rin ang kalaban sa pagtatapos ng match.