Isang malakas na pagtatapos ang ipinamalas ng Montana Pawnshop upang burahin ang 19-puntos na pagkakabaon at maiposte ang come-from-behind 68-65 panalo laban sa Lee Pipes-Ateneo kahapon sa PBL 2004 Unity Cup sa Pasig Sports Center.
Ang panalo ay pam-buwenamano ng Jewels sa torneong ito matapos ang dalawang bigong pagtatangka. Ang Eagles ay nahulog sa 0-3.
Isang higanteng laro ang ipinamalas ni Jon Dan Salvador sa itinala niyang 17-puntos, 16-rebounds at 2 blocks subalit ang kabayanihan ay napunta sa baguhang si Bryan Tolentino na ibinuhos ang 7 sa kan-yang 13-puntos sa huling 4 na minuto para kumpletuhin ang pag-ahon ng Jewels mula sa hukay.
Sa ikalawang laro, inirehistro ni Ronjay Enrile ang kanyang bagong PBL career-high na 27 puntos upang buhatin ang Toyota Otis-Letran sa kanilang unang tagumpay, 77-68 kontra sa Blu Star Advance. (IAN BRION)