Arevalo, di umubra kay Hsieh

Kinumpleto ng second seed Hsieh Suwei ng Taiwan ang pangmomolestiya sa Filipinos kahapon nang kanyang pataubin si Czarina Mae Arevalo, 6-2, 6-3 upang pamunuan ang mga paborito sa quarterfinals ng 12th Mitsubishi Lancer International Junior Tennis Championships.

Hindi inalintana ni Hsieh, ranked 23rd sa world juniors ang init sa Rizal Memorial Tennis Center at ang mga hiyawan ng mga manonood para kay Arevalo upang tapusin ang laban sa isang oras at itakda ang kanyang pakikipaglaban kontra eight seed Pichaya Laosirichon ng Thailand na nagtala ng 4-6, 6-2, 6-3 tagumpay kontra Australian Sevvy Gallos.

Ang iba pang umusad sa quarterfinals sa girls division ay sina top seed Angelique Widjaja ng Indonesia at ang dalawang top seed sa lalaki na sina Jonathan Chu at Prakash Amritraj ng Amerika.

Pinatalsik ni Widjaja ang Thai’s na si Montinee Tangphong, 6-2, 6-1 upang isaayos ang kanyang pakikipaglaban kontra Australian Adriana Szili na nanaig naman kontra Indian’s Megha Vakarra, 6-1, 6-3.

Tinalo ni Chu si Jan Stancik ng Slovakia, 5-7, 6-4, 6-3 habang ginapi ni Amritraj si Nishank Mishra ng India, 6-1, 6-2.