5th Asian Chess Challenge V sisimulan bukas

Nakatakdang lumipad ngayong alas-2:55 ng hapon ang dating University of Manila (UM) junior chess standout na si Almario Marlon Q. Bernardino Jr., patungong Kuala Lumpur, Malaysia upang sumabak sa aksiyon sa 5th Grand Asian Chess Challenge V (GACC V) International Open Chess tournament na gaganapin sa University of Malaya sa Kuala Lumpur, Malaysia simula sa Oktubre 14-20.

Kabilang sa mga kalahok na unibersidad at kolehiyo na sasali sa taunang tournament na sanctioned ng FIDE ay ang Peradeniya at Gunadarma ng Indonesia, University of Colombo ng Sri Lanka, Khon Kaen University ng Thailand, American University of Beirut ng Lebanon at ang 14 local schools ng host Malaysia.

Ang biyaheng ito ni Bernardino ay gagastusan nina Social Security System executive vice president Horacio "Horace" Templo at ng Paterno Builders Corporation at Consortium Management & Research Center president Eduardo "Boying" Paterno.