Hinaut nga dili tinuod ang pagduda sa House panel of prosecutors nga wala kaandam og depensa si Bise Presidente Sara Duterte sa pag-abot sa iyang turno karong buntag sa pagpadayon sa impeachment trial sa Senado. Hinaot nga sayop ang pasangil sa prosekusyon nga ang himuon sa mga abogado ug abogada ni VP Sara mao ra ang naandan nila nga paglangay-langay sa husay.
Hinaot nga tsamba lang, ug nga dili timaan sa kakuwang og pangandam sa depensa ug kalisod sa pagpangita og katuohan nga mga saksi ug mga ebidensiya, nga ang unang duha nila ka saksi pulos nibalibad.
* * *
Si Atty. Ralph Sarmiento naglikay nga dudahan nga Duterte supporter. Ambot wala ba magkasinabot, o nikalit og kahadlok si Sarmiento sa pagsubli under oath ang iyang mga komentaryo pabor ni VP Sara, angayng mauwaw silang Atty. Sheila Sison ug kaubanan.
Samtang si Atty. Suzette Balucanag-Punay, corporate counsel of GenCorp Industries Inc. ug Metro City Chow Foods Corp., duha sa mga kompaniya nga gideklarar sa statements of assets, liabilities and net worth ni VP Sara nga iyang gipanag-iya, ipubos sa MRI scan.
* * *
Pero kon tuohan ang tigpamaba ni VP Sara nga si Atty. Paolo Panelo andam sila sa turno sa depensa. Samtang padayong niinsistir nga walay ebidensiya nga napakita ang prosekusyon.
Kon wala pay ebidensiya, nganong nisuway si VP Sara pagpugong sa House ug Senado pagtuman sa ilang trabaho? Kon wala pay ebidensiya, nganong gibabagan ang pagsupina sa bank accounts ug income tax returns? Kon wala pay ebidensiya, nganong nisuway pagbabag sa formal offer of evidence sa prosekusyon?
* * *
Nipasangil si Panelo nga napakyas ang prosekusyon pagmatuod sa bisan unsang pasangil batok ni VP Sara. Kon palpak ang prosekusyon, nganong gipasupinahan pa man ang pasiunang 25 sa kinatibuk-ang 90 nila ka mga saksi?
Kon inutil ang prosecutors, nganong wala man mopasaka og motion to dismiss aron mas laktod nga mabasura ang article of impeachment batok ni VP Sara? Kon nagpataka ang prosekusyon, nganong nangumbinser (ug gikataho nga gibalibaran) sa bantogang accounting firms sa pagsukwahi sa pasangil sa forensic financial expert sa prosekusyon nga posibleng moabot og P1.5 bilyones ang tinagoang katigayonan ni VP Sara?
* * *