Daghan ang gaingon nga ang mga kabataan karon “mentally, emotionally ug physically weak” o huyang sa halos tanang aspeto sa kinabuhi kun itandi sa mga kaagi sa ilang mga ginikanan ug mga apohan.
Dunay mga rason nganong naingon ani ang kabataan karon. Tungod sa pagkaon, balaod, pamaagi nga gisagop na sa kinabag-an karon apil na sa edukasyon ug ilang kabutang hasta pud ang lugar diin sila nagdako.
Apan usa sa mga labing dako og impluwensiya kanila mao ang teknolohiya. Kaniadto ang mga bata kun magduwa, duna gyuy laing bata nga kaduwa, pisikal nga duwa diin mogamit sila sa ilang kusog, kaalisto, hunahuna ug uban pa.
Pero karong panahona, lahi na kay ang mga bata nahilig na sa computers, gadgets, tablets ug uban pang gamit nga wala magkinahanglan og paggamit og pisikal nga kusog.
Kaniadto ang duwa sa mga bata dili lang sa pisikal kondili apil sa komunikasyon diin makat-on sila pakig-estorya, negosasyon, dungan nga mokatawa, dungan nga masakitan ug dungan sab nga makat-on sa mga pagtulon-an sa kinabuhi.
Tungod ana, mas lig-on sila og panglawas, mas moagwanta, mas lapad og paminsar sa hunahuna, dili daling mawad-an og paglaum ug dili sad basta masakit.
Basi sa uwahing pagtuon sa World Health Organization, duha sa kada lima ka batan-ong Pilipino ang niangkon nga dili kaabot og usa ka oras kada adlaw ang ilang pisikal nga kalihokan, layo kaayo kumparar sa ubang mga kabataan sa laing mga nasud.
Ang WHO niingon nga gibanabanang 40% sa mga bayong-bayong nga nag-edad 11 hangtud 17 anyos sa Pilipinas ang wala makasuway og aktibong adlaw sa usa ka semana.
Mas daghan niini sa mga batang babaye, mao nga daghan kanila karon ang mga obese o sobra sa timbang basi sa ilang edad ug gitas-on.
Ang gipasabot anang aktibong adlaw, nakalihok og dili moubos usa ka oras nga moderate-to-vigorous physical activity sama sports ug uban pang kalihokan nga makapakusog ug makapalig-on sa kasingkasing.
Ang mga kabataang menus kaayo og pisikal nga kalihokan daling masakit og diabetes ug sakit sa kasing-kasing sumala pa sa WHO. Dali sad silang mo-surrender sa mga problema, ang uban maghikog.
Kung dili molihok ang gobiyerno bahin ani, responsibilidad gyud sa mga ginikanan nga himuong parte sa kinabuhi sa ilang mga anak ang pisikal nga kalihokan kada adlaw.