Daghang mga kagubot nga nahitabo didto sa Europe nga tungod niini nanglihok ang mga prepping communities. Daghang nahitabo nga mga panic buying aron kun unsay mahitabo dunay daghang mga stocks sulod sa daghang mga adlaw.
Ang mga nagkadaiyang cyberattacks ang niparalisa sa mga patigayon ug uban pang mga kalihukan. Butang nga nakapadugang sa kagubot nga nahiagoman. Dugang kaguliyang, the more nga maparalisa ang nasud ug tingali ang tibuok kalibutan. Pun-an pa niining mga doomsday predictions nga kuno matapos ang kalibotan karong November 13, 2026. Kini base sa mathematical calculation nga gihimo pa niadtong tuig 1960.
Kun ugaling kini mahitabo, wala man gihapon kitay mahimo. Kun mao man gani kini ang mahitabo, nan, unsa man ang atong buhaton? Mangandam. Dili karong mga panahona kondili sa matag adlaw sa atong kinabuhi. May mga panghitabo man o wala angayan gihapon kitang mangandam. Kini tungod kay ang atong kinabuhi bisan gani ang uniberso diin kita sakop ang mahiabot man pud sa punto nga mahiagom sa katapusan.
Gani, dunay nag-ingon nga ang atong kasamtangang uniberso salin lamang sa laing uniberso kaniadto. Ingon ini ka limitado ang atong kasinatian ug panahon. Daghang mga butang misteryoso nga wala pa gyud nato masayri ug matugkad.
Ang panic buying ug ang kagubot mismo, nisalamin lamang kun unsa kita nga matang sa pagka linalang. Mga linalang nga maayo lamang sa sugilanon apan walay igong ngipon aron tumanon ang atong baruganan.
Kini tungod kay daghanan kanato ang buot lamang maneguro sa kaugalingon apan walay igong kaisog nga panalipdan ug palipangon ang kalibutan sa kalambigitan. Hinumdomi ang mga mga ginagmay nga suliran ug kahuyangan nga mapasagdaan mamahimong hinungdan sa mas dako pa nga kagubot ug kalibotanong kabalisa.