Nalipay ko pagkabasa sa balita nga ang Cebu City government mimando na nga pahunongon sa ilang business ang mga balay patigayon nga wa gyud moguba sa kabahin sa ilang estraktura nga anaa daplin sa sapa.
Matud pa nga 17 ka balay patigayon, naglakip sa tulo ka supermarkets, ang gimandoan nga pasirad-an. Nindot gyud kaayo ang kamandoan sa Business Permit and Licensing Office (BPLO) nga gidumala ni Andrew Borres.
Kini ang gipaabot ko nga mahitabo kay mao man ni ang gipahibawo sa mga opisyal sa Cebu City government nga kadtong dili moguba sa estraktura nga anaa sulod sa three-meter easement gikan sa tampi sa sapa, sirad-an gyud.
Ang tagdumala gani sa Philippine Star ug The Freeman nga usa ka media outlet, mipaguba man gani dayon, unya sila dili?
Ang gimandoan nga pahunongon na sa ilang business hangtud nga mahuman pagguba ang kabahin sa ilang estraktura nga anaa daplin sa Estero de Parian (kanang sapa nga naglumbay sa Colon Street) mao ang mosunod.
Gaisano Main, Colonnade Supermarket ug 138 Mall,Plastic N’ Things, Ngohiong Express, TY Bldg, Leo’s Motor Parts, Conchings Electrical Supply, Grease Monkeys Carwash and Detailing Services, Paterno Bldg, D’Lucky Motor Parts, MS Electronics, Caldereta Special, Multiple Rental, LMB Worldwide Services nga parehong nahimutang sa Manalili Street.
Ang uban nga gimandoang pasirad-an mao ang Queen City Realty, ug VRJ Engineering sa Palma Street.
Ang tagdumala gani sa Barangay Tinago mipaguba na man sa bungbong sa ilang Barangay Sports Complex.
Duna pay laing mga balay patigayon ug mga opisina sa kagamhanan nga apilon sa kampanya sa siyudad pagpaguba sa ilang estraktura nga nasulod sa three-meter easement.
Awhag sab nako nilang General Aderson Comar, ang hepe sa PROBE north district nga gub-on gyud ninyo kanang balay nga anaa sa sapa nga kabahin sa Estero de Parian tungod gyud sa Arellano Bridge.
Kon dili ninyo kana gub-on, matahapan mo nga mihatag og pabor kay samtang giguba ang uban, kana wala. Himoa ang popular kaayo nga slogan kaniadto ni kanhi PNP Chief Ping Lacson nga “enforcement without fear and favor.”
Tambag nako sa tanan nga nalambigit sa Gubat sa Baha, tabangi ninyo nga malimpyo ug mapabalik ang karaang gidak-on sa Estero de Parian.
Kaniadto lagi kuno, makasulod ang mga sakayan nga de-katig gikan sa dagat paingon diha sa Colon Street kay magkarga og mga “barter goods” kay ang usa ka klase sa negosyo kaniadto mao ang mga produkto, ilisan og mga hayop, mga bisan unsa nga abot sa kaumahan.
Karon, sus, ang kabahin sa Estero de Parian dili gani maagian og tawo diha ilawom sa Gaisano Main grocery section.