Sa kasaysayan, sa atong panahon gipadayag sa Bibliya ang katumanan nga ang atong nasod maoy katawhan sa Dios. Tungod kay nagpabilin kitang maunongon mapailubon sa daghang gumonhap apan hangtud karon nakabarog kitang mapagarbohon ug malaumon nga sa kapulihay maangkon ra nato ang kalamboan.
Bisan sa mata sa kalibutan, nakita nila ang kasamok ug ang naghitak nga kurapsyon sa atoa. Apan may nakita usab silang hiyas kanato nga nakapabuka sa ilang kahimatngon. Gamay kitang nasod apan may katakos sa pagpadagan o momaniobra nga mamatngonang di malukapa ang atong ekonomiya sa nasod.
Sumala sa nasigpatan natong report ni Knight Frank ug sa Citi Private Wealth’s 2012 Wealth Report, nagpakita og gipaabot nga mamahimong usa sa kinalig-onan ekonomiya sa tibook kalibutan ang Pilipinas sa umaabot (4) upat ka dekada o 2050 kay nalakip man kini sa top 10 nga nasod, nga usa sa paspas ang pagtubo sa ekonomiya. Aduna silay benchmark o sukdanan nga gibasehan niini sumala sa nakita nga kalihokan o performance sa ekonomiya sa usa ka nasod.
Matud pa, ang atong nasod mahimong usa ka tinubdan nga may mga lig-ong merkado nga hugopan sa mga dagkong inbestor sa tibook kalibutan. Ang North Amerika ug Europe sa pagkakaron, mitidlom pag-ayo ang ilang ekonomiya. Sa tuig 2050, gipaabot usab sumala sa analisis sa report ni Citi chief economist, Willem Buiter, ang India ang nag-una, China ang ikaduha ug ang Estados Unidos ang ikatulo, nga gipaabot mahimong mga higanteng ekonomiya sa kalibutan.
Busa atong ikupot ang atong kamot sa pakighiusa, nga ang palaaboton may katinuoran gayud nga mapuslan sa atong kaliwatan. Karon ang panahon, nga mas doblehon ang pagpakabana nga mahimo kitang instrumento sa pagpalambo sa atong tingusbawan ug sa isigkaingon, nga molig-on usab ang atong nasod.
Ang mga kabos nga nasod sa pagkakaron, nahigmata na nga nakaalinggat sa lintunganay, nga ang kalidad sa usa ka institusyon ug ang politikanhong kaligdong maoy gikinahanglan sa kapaspas sa pagtubo nga molig-on ang usa ka nasod. Mahimong imposible kining mga pangagpas sa atong mga batid o eksperto sa ekonomista sa kalibutan apan may sukaranan kay may naumol nang mga timailhan. Kun wa kitay hugot nga pagtoo, aw igo lang ta sa kawad-on.