OK ko sa gihimo sa Comelec nga paphaon sa listahan ang pipila ka mga party-list nga angay’ng tangtangon sa listahan.
* * *
Gisugdan na sa Comelec ang maong pagpamapha ug kini angay nga welkamon o hangopon sa katawhan kay kini namugna sa mga abtik nga politiko nga gustong pahimudsan ang kahuyang sa balaud.
* * *
Naay party-list pananglitan nga kuno alang sa mga sikyu ug drayber sa PUJ apan gisakyan sa politiko nga walay koneksyon bisan gamay sa maong mga kaigsuonan tang kabus.
* * *
Naay mga regional party-list nga gipanaktak kay sa pagkatinuod wala kini kinahanglana sa mga molupyo sa rehiyon nga ila kunong girepresentahan. Kay ngano? Duna naman kini sila pinili nga representante sa Kongreso.
* * *
Naay usa ka party-list diin ang first nominee amahan, second nominee inahan ug ang ikatulo nga nominee usa sa mga anak sa pamilya nga maoy miorganisar sa maong party-list.
* * *
Ang party-list gud gimugna kini aron kahatagan og representasyon sa Ubos Balay Balauranan kadtong mga marginalized kun kabus nga mga pundok sa katilingban nga nagkinahanglan og representasyon sa Kongreso.
* * *
TRIVIA. Greetings sa atong mga higalang magbabasa diha sa South ug North bus terminal. Salamat kaayo sa inyong nagpadayong suporta sa Banat News.