Si Eustaquio Tal-ot angga “Takols” 40 na ka tuig nga manindahay og balot sa Siyudad sa Sugbo. Nalingaw ko samtang nagkaon sa iyang balot este sa iyang baligyang balot tungod sa kakulisaw sab manabi.
Matud pa ni Noy Takols kanang linyang “itlog mo noy orange” usa lang na sa mga kataw-anang linya sa mga sama niya nga manindahay sa kadalanan bunga sa paningkamot.Kun mga linyang kataw-nan lang ang hisgotan mas daghan sa mga mamalitay kay sa mga nagbaligya.
Sama sa pag-ingon ko nga nagkaon ko sa iyang balot matud pa ni Noy Takols “simbako ka sir bahala’g mabayot basta dili lang ning ako mabalot”(Toink!/Aguy!) Hehehehehehehe!
Si Noy Takols mipaambit naku og mga Rated R nga sugilanon.
Takols – Balot….. balot…….. balot…….
Mano: Balot na Dong?
Takols: O Noy palit ka?
Mano: Dili nangutana lang!(Toink!/Ayay!)
Hehehehehehehehehehehehehe!
Diha daw hubog kaayo daghan og patik nga mipalit og balot.
Hubog: Hoy! Balot na..
Takols: O sir….
Hubog: Tagpila?
Takols: 12 sir.
Hubog: Ang buak?
Takols: Tag 8 sir.
Hubog: Bi tagai og buak..
Takols: Wa may buak Sir.
Hubog: Hala balik lang unya og mangabuak na(Aguy!/Toink!)
Hehehehehehehehehehehehehe!
Diha daw tiguwang babaye nagtuo siyang mopalit.
Mana: Balot na Dong?
Takols: O nang.
Mana: Naay suka nga aslom?
Takols: Pwerteng asloma.
Mana: Ay salamat tagai ko gamay Dong kay para buwad (Toink!/Aguy!)
Hehehehehehehehehehehehehehe!
Apan samtang nagkinataw-anay mi mikalit lang siya pagsal-ot sa hisgutanan sa politika. Matud ni Noy Takols ang mga politiko walay kalainan sa linyang “Itlog mo noy orange”. Matud niya ambot og duna pa bay politiko nga masaligan ang tinuod nga bulok.
Mga politikong naglantaw gyud sa interes sa katawhan ug dili ang iyang kaugalingong kabulahanan. Kun duna pa man ning panahona matud ni Noy Takols hanap pa kaayo sa iyang panan-aw.
Ang mga politiko karon alang niya pulos mga orange og itlog. Lahi og bulok magpatuong tabunon apan lahi diay og kolor kun makalingkod na sa gahum.
Yano nga sanglitanan, mahimong dili haom sa unsay buot niyang ihulagway sa mga tawong nagtinguha kunohay nga moserbisyo sa katawhan.
Apan makahuloganon sa subling pagpahinumdom nga ang tinud-anay nga bulok mahimong katabunan sa mga tam-is nga pasalig.
(emailad: jomar_bellita@yahoo.com.)