Atbang sa Honda Morots nga anaa mahimutang duol sa main gate sa Cebu Waterfront Hotel, Salinas Drive, Lahug ning siyudad, anaay waiting shade nga gipandungan sa mga naglaray’ng kahoy tungod sa vacant parking lot nga iyaha sa IT Park. Sugod alas 7:00 sa gabii, gihimo ning tapokanan sa mga batang babaye nga nag-edad pa lang og 10 ngadto sa 15 anyos.
Pulos mga seksing sapot ang gipangsul-ob (pakigol kaayo: mag-panty short lang ug maguwang la’g diyotay sa debraso ang matang sa sleeveless shirt nga ipares). Puro foreigners nga lalaki maoy ilang target. Kini segun pa sa asoy nilang Pit Supervisor Fel Cabrera ug Card Dealer Carlo Guian, kinsa pirme gyung makaakto pagkakita unsay gibuhat niining mga batan-on ngadto sa mga langyaw.
“Luoy kaayo ang mga foreigners, Boss Jav.” Pasiunang tug-an sa duha ka Pagcorians ning tagsulat. “Kay tapok-an ug dumogan sa mga bata nga may sobra sa dosena ang ilang gidaghanon. Hikaphikapon nila ang lawas sa Koreano ug hayophapyoron ang bolsa. Matagbaw intawog lihay ang Koreano, uy! Ang ubang foreigners sama sa Hapon, kinsa nakasinati na sa kabuang sa mga bata, modagan palayo tungod sa kahadlok!”
“May nasusundan din ako, Boss Jav.” Dugang kompisal ni Carlo, kinsa usa ka lumad nga Tagalog. “Sa sobrang yakap at kulit ng mga bata, hindi napansin ng Intsek na yong key card at brochure niya sa hotel ay nahulog galing sa likorang bolsa. Takot kasi ng mga bata, eh! Ang ginawa ko ay... nini-retrieve ko yong card key na hawak na ng isa sa kanila at hinahabol ko ang tumatakbong tao para isusuli ang bagay na di niya alam ay wala na sa kanyang possession.”
“Dinha pa gyu’y higayon nga naahat og katrapik ang dalan, Boss Jav.” Sumpay ni Fel. “Kay ang Koreano nga gigukod sa mga bata, milabang man sa dalan ug mihunong sa tunga. Siyagita lagi sa serbato sa mga sakyanan.”
Maka-uulaw ang gibuhat sa mga bata. Mao kini ang komentariyo sa duha ka Pagcorians, kinsa nagpakabana sa epekto niini sa atong Tourism Industry. “Basin momenus na nuon ang mga turista nga manganhi sa ato tungod ning kabuang nila, Boss, Jav.” ni Fel pa nga klaro kaayo nganong ila kong gisultian sa maong problema. Kay gusto niya nga ipa-Banat News ni ning tagsulat. Ayawat na lang mabasahan sa mga concerned government authorities ug mahatagan dayo’g aksiyon.
Bitaw, mga tagdumala sa atong Tourism Industry dinhi sa Pilipinas, kining kahasol nga gihimo sa mga bata naghatag og buling sa gipanghambog tang ‘More Fun in the Philippines.’ Mga abog sila sa kagabhion nga angay’ng silhigon ug hiposon sa labing daling panahon.-- Javier Y. Tapulado, Banawa, Cebu City