Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.
Nagpadayon ang mga pro life advocate ug ang atong kaparian sa ilang pagsupak sa pagpalabang sa Reproductive Health Bill nga padayon pa nga gilantugian sa atong mga magbabalaod sa nasud.
Nunot usab kini sa nagpadayon nga pagpangandam sa atong kadagkoan sa simbahang Katoliko sa gikatakda nga canonization ni Blessed Pedro Calungsod nga gikatakda karong Oktobre 21 niining tuiga.
Taliwala niining nagpadayon nga pagbarog sa mga relihiyosong Katoliko sa kusganon nilang pagbarog sa pagsupak sa pagpalabang sa balaodnon nga RH Bill ug sa nagpadayon nga pagpangandam sa canonization ni Blessed Pedro Calungsod wala usab magpaiwit sa mga kontrobersiya ang Sugbo nga naglambigit sa mga inilang politiko.
Naglakip na niini mao ang pagtumaw sa isyu nga naghambin og katahap nga pagbaton ni Cebu City South District Congressman Tomas Osmeña og luhong sakyanan nga gikan sa Big Foot nga gipintalan og sakyanan sa kapolisan ug adunay silyo sa kagamhanan sa siyudad sa Sugbo ug gibutangan pa og siren.
Ang pagtumaw sa maong isyu maoy nag-aghat kang Cebu City Michael Rama sa pagpasaka og kaso ngadto sa Ombudsman Visayas batok kang Kongresista Osmeña kinsa misaway usab nga showbiz lamang ang maong lakang nga gihimo batok kaniya.
Samtang nahimong sumsoman ang maong isyu sa mga Sugboanon laing isyu nga kalit lang mitumaw mao ang pagtakli ni Kongresista Osmeña sa mokabat P400 milyones nga gahin ngadto sa 1st District sa lalawigan sa Sugbo. Nahimong init nga isyu sa tapok-tapok sa mga Sugboanon ang maong lakang nga gihimo ni Osmeña apan kalit usab nga mitumaw ang lain pa gayod nga isyu nga nakapatay-og usab sa simbahang Katoliko nga mao ang pagpalusot sa mga ivory nga gihimong imahen sa mga santos ug ingon man sa imahen ni Senyor Santo Niño.
Labi pa gayod nga natay-og ang Sugbo sa pagtumaw sa maong isyu tungod kay usa man sa gilambigit si Monsenyor Cristobal Garcia nga giila ug gitamod nga opisyal sa simbahan sa mga relihiyosong Katoliko dinhi sa Sugbo. (Romeo T. Limpangog)