Daghan kaayong wa magpakabana sa kamahinungdanon sa SSS ilabi na sa mga nanginabuhi sa ilang kaugalingong panlimbasog.
Sama sa mga drayber sa traysikol, habal-habal, mga vendor ug uban pa kinsa nagdahom nga ang ilang ibayad nga premium sa SSS mas maayo pang ipalit nila og sigarilyo o lotto kay may mapala pa sila.
Kay ang maong sector sa katilingban nagtuo nga ang SSS alang lang sa mga nangempliyo nga may amo ug di alang sa mga nanginabuhi nga way amo.
Dinhi nasayop ang daghan kaayong Filipino lahi sa mga nagpuyo didto sa America nga way laing gilauman ang matag usa ka tawo didto gawas sa ilang SSS.
Kini tungod kay ang SSS pag-abot sa adlaw maoy mohatag og pension sa usa ka tawo nga mitigom sa iyang ginagmay’ng kinitaan adlaw-adlaw diha sa maong ahensya nga gipadagan sa kagamhanan.
Sa premium nga tag P312 matag buwan, ang usa ka tawo nga may paglantaw sa iyang pamilya sa umaabot nga panahon, di mahanugon niini sa pagtigom diha sa SSS.
Kun mamatay siya human sa tulo ka tuig niyang pagka-membro sa SSS may pension nga madawat ang iyang asawa sa tibuok kinabuhi niini, busa di kini makahunahuna sa pagpangita og laing bana.
Sa sector sa mga drayber sa trasyikad, habal-habal, mga vendor ug uban pa nga may kinitaan matag adlaw, ang usa ka utokan nga tawo himoon niyang alakansiya ang SSS alang sa kita niyang tag-P10 matag adlaw .
Ang uban mogasto pa og P100 sa sigarilyo, lotto, ug uban pang bisyo nga pagtagbaw sa gana sa iyang lawas, apan wa maghunahuna sa kaugmaon sa iyang pamilya. Inigkamatay nga di membro sa SSS wa gyuy matila ang pamilya, kay imong kinitaan igo ra man sa imong panginahanglan adlaw-adlaw ug wa ka maggahin og para sa imong ugma.