Buloy: Bitoy unsay meaning sa SWAT?
Bitoy: Special Warfare and Tactics niadto.
Buloy: Karon diay?
Bitoy: Sikad, Wakli and Tikdol(Toink!/Aguy!)
Hehehehehehehehehehehehe!
Lisod man komedyahan ang kasinatian karon sa duha ka sakop sa SWAT nga na hot water human madagmali ang Papua New Guinea national nga si Bennidict Penini sa ilang tinguha pagpakalma sa nagmaoy nga langyaw dili makaipsot ang mga hingtungdang tigpatuman sa balaod sa mga pagsaway.
Tataw ug klaro sa eksklusibong bidyo sa TV Patrol Central Visayas nga paingon na sa pagtahan ang langyaw dihang ilang gigamit ang gitawag og “necessary force” sa PNP pagpakalma sa usa ka alarmadong tawo nga magmaoy o manghasi.
Kasinatian nga sa makausa pa angayang kuhaan og leksiyon sa kapolisan sa matag higayon nga motubag og bisan unsang sitwasyon.
Mooyon ko nga posebling nadala lang sa emosyon ang duha ka sakop sa Swat hinungdan nga ilang nabastrok, nasikaran ug gipatiran ang langyaw. Posebling tungod sab sa panagana nga lansis lang unya ang gipakita sa langyaw hinungdan nga gisiguro nilang ma-neutralized gyud ang langyaw.
Apan bisan unsa pa ang hinungdan nga gamitong panalipod sa mga hingtungdang polis kinahanglang atubangon nila ang sangpotanan sa ilang nahimo.
Tinuod dili man sayon ang katungdanan sa usa ka tinugyanan sa balaod, apan obligasyon ug responsibilidad sa matag polis ang pagpatigbabaw sa kaangayan, pagpanalipod sa interes ug tawhanong katungod masinumbong man nga lokal o langyaw ang hingtungdan.
Mana: Olrayt klas use the word brutality in a sentence?
Senyang: A policeman is under investigation due to police brutality.
Mana: Very good Senyang… Ikaw Bitoy use the word brutality in a sentence.
Bitoy: Mam duna koy migo giimbitar kog laag og laing lugar….. ako siya giingnan
Bro Ta Leyte ta adto ha! O mam ha klaro kay na Brotaleyte (Toink!/Ayay!) Hehehehehehehehehehehehehehe!
Inay nga mokalma ug magduhaduha na ang mga sakop sa SWAT sa pagrespondi og alarma panahon hinoon ni sa pagkugi ug pagmatuod nga ang nahitabo dili maoy imahen sa mga sakop sa SWAT sa Siyudad sa Sugbo.
Kun sayop man ang nahimo sa mga hingtungdang sakop sa Swat dili to pagpangabuso ug paglapas sa katungod kun dili kasaypanan sa usa ka aksiyon nga dili kalikayan nga mahitabo gyud ni bisan kinsa.
Bisan ako kombinsido nga dili taras ug kinaiya nila ni PO1 Philip Tanza ug PO2 Bradford Lavandero ang pagdagmal.
Apan musugot ta og sa dili, mobati ka man nga tawag sa katungdanan ang maong aksiyon angayan ug matarong lang nga ipatuman ang proseso ug ipatuman ang tukma ug unsay gilatid sa balaod kun kapamatud-an ang gituhoang kasaypanan.
(emailad:jomar_bellita@yahoo.com)