Daghan ang nag-ingong nga nahimong suliran sa kapolisan dihang mikuyanap sa kabarangayan ang mga video karera machine sanglit giisip man kini nga laing matag sa ilegal nga sugal.
Matud pa nila nga ang maong matang sa ilegal nga sugal dali kaayong mamatikdan sa kapolisan tungod kay makita man sa mga silingan ang video karera nga maoy kahimanan sa maong matang sa ilegal nga sugal. Sa gihingusgan nga pagpangsakmit sa mga polis sa mga video karera machine daw mikunhod na usab ang maong matang sa ilegal nga sugal sa kabarangayan.
Dugang pa nila nga nunot sa maong pagkunhod sa video karera machine sa kabarangayan maoy namatikdan ang pagbalik usab og kuyanap sa ilegal nga sugal nga masiao. Sa nangaging panahon ang ilegal nga sugal nga masiao maoy gibasehan ang usa lamang ka resulta sa matag adlaw sa Jai Alai nga giingong gikan sa Cagayan ug gikan sa Sugbo. Ang mga pinansir sa maong matang sa ilegal nga sugal daw mipahimulos usab sa kusog kaayong pagpamasin sa katawhan nga modaug sa swertres sa Lotto nga ubos sa Philippine Charity Sweepstake.
Namatikdan usab ang pagkuyanap sa masiao sa swertres sa kabarangayan nga matigayon sa makatulo usab ka hugna nga pagpusta nga ang resulta ilang gibase sa tulo usab ka hugna nga pagbola sa swertres.
Gitug-an sa pipila ka mahiligon sa maong matang sa sugal nga niining panahona hilabihan na ang pagkuyanap sa kabarangayan sa masiao nga swertres dinhi sa Sugbo. Giangkon nila nga nahimo kining higpit nga kumpitinsiya sa legal nga swertres nga anha mapalit sa mga Lotto outlet nga gipadagan sa PCSO.
Matud pa nila nga daghan ang madani sa pagpusta sa swertres nga masiao kay ang mga sugarol mahimo man lang nga makapalit og P1 ang matag kombinasyon sa numero nga modaug og P500.
Samtang sa Lotto outlet sa PCSO ang matag kombinasyon sa numero mapalit sa P10 ug kun mogawas maoy madawat sa makadaug ang P4,500 nga debedendo sa matag kumbinasyon ug P750 usab kun marambol ang resulta sa numero. (Romeo T. Limpangog)