Walay makakwestyon ni Michael Gleissner kun adto niya ihatag ang duha ka V6 Dodge Charger nga sakyanan sa mga Osmeña, ug dili ngadto sa dakbayan sa Sugbo.
Daghan g’yud hinoon ang nagtoo nga ang maong sakyanan gihatag ra ni Gleissner kang Kongresista Tomas Osmeña nga nautangan niya’g buot dihang gitabangan siya nga makakuha og Filipino Citizenship.
Apan pasagdi lang kay matud ni Tommy, gipalit man kuno ni Minnie Osmeña ang maong mga sakyanan nga wala idayon ni Gleissner sa paghatag ngadto sa dakbayan sa Sugbo.
Usbon nako, walay makabuot ni Gleissner kun kinsa ang iyang hatagan o baligyaan sa iyang butang. Ang isyu diha mao ang paghimo sa maong sakyanan nga “police vehicle” nga dili man kini iya sa kagamhanan. Kun gitugot pa lang na sa balaud kadaghan kaha nga mga datu nga usa o duha sa ilang mga sakyanan himoon usab nila nga police vehicle. Ang Presidential Decree 96 gud, nagdili sa mga civilian vehicle nga mabutangan og siren ug blinker.
Labaw na nga dili kini mamarkahan og POLICE. Ang sakyanan nga giingong “napalit” ni Minnie gikan ni Gleissner, gipintalan nga mora g’yud og sakyanan sa kapolisan ilabi na nga gimarkahan kini og Cebu City POLICE.
* * *
Ang pahibalo ni Tony Cuenco nga mosibog siya sa iyang tinguha nga molansar pagka kongresista sa south district ubos sa Team Rama karong sunod tuig, mora’g dili kaayo maayo tan-awon.
Makapalig-on kini sa giingon ni Tommy kaniadto nga si Cuenco ikatandi sa usa ka sundalo nga mobiya sa iyang mga kauban samtang anaa na sila sa panggubatan. Siya maoy nag-una-una sa pagpahibalo nga molansar siya pagka kongresista.
Ang iyang rason basi sa suwat nga gipadala niya kang Mayor Michael Rama nga maoy lider sa Team Rama mao nga migrabe kuno ang iyang sakit nga vertigo. Kining “vertigo” sakit kini nga ang matakboyan makasinati og dili masabot nga sitwasyon.
Gi-research nako sa internet ug akong nahibaw-an nga kining “vertigo” kun matakboyan ka, mora’g maglihok ang tanang butang nga anaa sa imong palibot. Matud ni Cuenco nga migrabe ang iyang vertigo sa milabay’ng mga adlaw.
Gitambagan kuno si Cuenco sa iyang doktor nga dili na lang mopadayon sa kapoy kaayo niya nga ambisyon nga magpolitiko kay mosamot ang iyang vertigo.
Unya, ang pagtrabaho didto sa Jakarta, Indonesia isip secretary general sa Asean Inter-Parliamentary Assembly (AIPA).
Dunay nagtug-an nako nga ang bug-at nga rason nga si Cuenco miatras mao nga nahadlok siya sa kwarta ni Konsehal Bebot Abellanosa ug sa BOPK.
Matud ni Tommy nga daan na sila nga nasayud nga mosibog gayud si Cuenco pagkandidato. Na hala, fight Konsehal Joey Daluz. Kay ikaw man ang gisugyot nga puli ni Cuenco, fight sa iyang pagpangampanya.
Apan si Daluz nagtoo nga karong si Cuenco miatras na sa tinguha nga magkandidato, molansar na kuno si Konsehal Margot Osmeña pagka kongresista sa south district.
Wala ko makasabut sa “logic” ni Daluz. Gipasabot ba nimo Konsehal nga mahadlok si Margot nga makigkontra ni Cuenco? Nasabtan nako nga si Margot magsunod ra g’yud sa kabubut-on ni Tommy ug sa partido.
Gipangutana nako si Margot niini og gitubag ra ko niya nga “Abangan!”