Septiyembre 02, 2012: IKAKAWHAAG-DUHA NGA DOMINGO SULOD SA TUIG
Mga Pagbasa: Dt. 4;1-2,6-8/Sal. 15/San.1;17-18,21b-22,27/Mk.7;1-8,14-15,21-23
Daghan kanato ang nahimong mangutana sa mga balaod ning kalibutana. Nag-apas kita sa mas duol o dili ba kaha praktikal nga interpretasyon niini. Sama sa nahitabo sa atong Ebanghelyo karon, ang mga tawo nga nagpalibot ni Jesus ang nangutana kun nganong wala manghunaw ang mga tinun-an ni Jesus sa wala pa sila mangaon. Metikoloso sila niini ug daghang mga balaod ang namugna gumikan ning maong mentalidad ug panlantaw. Ang Kinabuhing Kristohanon ang masukod lamang sa balaod sa Gugma nga maoy sinugdanan ug katapusan sa tanang paningkamot. Ang atong Ginoo ang nihimo og pagbuyag dili tungod kay supak siya sa maong balaod kondili buot niyang himoon ang maong balaodnon ingon nga moalagad sa tawhanong kaayohan ug dili himoon ang tawo nga isakripisyo gumikan lang sa mas estrikto nga pagsabot sa kahulogan sa balaod.