Si Visayas Ombudsman Pelagio Apostol niangkon nga lisod badlisan asa matapos ug asa magsugod ang opisyal ug personal nga mga lakaw sa pipila ka opisyal o kawani nga gitugyanan og mga sakyanan sa gobyerno. Apan ang mahinungdanong timaan sa kamakiangayon, pasabot niya, mao ang tinuod nga katuyoan sa paggamit. Sa iyang pagtambong sa paglusad sa “Tubag!,” ang labing bag-ong programa sa ABS-CBN Channel 3 ug DYAB Abante Pa, Bisaya!, si Apostol niingon nga sayon rang paglusot sa mga mayor, gobernador ug ubang piniling mga opisyal kay gipaabot silang maghimo sa ilang trabaho adlaw ug gabii ug bisan atol sa weekends ug holidays.
* * *
Matud ni Apostol lisod lalison ang kinaham nga lusot sa mga politiko nga nag-pulung-pulong o nangonsulta sa mga molupyo sa nagkalainlaing kabarangayan bisan sa lawom nang mga takna sa gabii, bisan kun ang tinuod nga tuyo mao ang pagpamintaha ug pangampanya na alang sa piniliay sa Mayo sa sunod tuig. Apan nipasalig si Apostol nga susihon sa ilang buhatan ang tanang reklamo gikan sa mga magbubuhis nga na-eskandalo sa wa nay pupanagana nga pangabuso sa mga sakyanan sa gobyerno. Nipasidaan si Apostol nga kun masakpan nga gipasakay ang asawa o mga anak ug nga suroy-suroy ang tinuod nga tuyo, segurong masuspenso, mataktak sa trabaho ug, kun mosangpot sa kadaot sa sakyanan sa gobyerno, mapriso.
* * *
Nagkauyon ang mga nanambong sa paglusad sa “Tubag!” sa Castle Peak Hotel nga molampos lang ang kampanya batok sa pangabuso sa mga sakyanan sa gobyerno kun motabang ang publiko. Ug nga ang “Oplan Red Plate” pasiuna lang sa paglusad sa mas lapad nga kampanya batok sa mas komplikadong mga matang sa pangurakot. Apil sa nanambong silang LTO 7 Regional Director Raul Aguilos, LTO 7 Assistant Director Arnel Tancinco, LTO 7 Resident Ombudsman Vicente Gador Jr., Atty. Philip Camiguing sa Visayas Ombudsman, Pagasa Mactan Director Oscar Tabada, CPPO Director Patrocinio Comendador, CPPO Deputy Director Renato Malazarte, Ariel Yburan sa LTFRB 7, House Deputy Speaker Lorenzo Tañada III ug ABS-CBN Visayas Cluster Head Tata Cinco-Sy.
* * *
Apil sa mga nadakpan sa operasyon sa Oplan Red Plate Task Force nga among giapilan mao ang mga sakyanan nilang Gobernador Gwen Garcia, Board Member Peter Calderon, Mayor Ronald Guarin sa Oslob, Bise Mayor Daydee Zambo sa Toledo City, Cebu City Veterinarian Alice Utlang, Dr. Gerardo Aquino sa Vicente Sotto Memorial Medical Center ug sa Citom, Danao City ug mga munisipyo sa Consolacion, Minglanilla, Ronda ug Dumanjug. Gipangayoan na sa Visayas Ombudsman og katin-awan ang mga opisyal ug mga buhatan nga nadestinohan sa nasakpan nga mga sakyanan sa gobyerno. Nipasalig si Apostol nga ipahibawo nila sa publiko sa labing daling panahon ang sangpotanan sa ilang imbestigasyon.
* * *
Email: leo_lastimosa@abs-cbn.com