Dili na bag-o ang gipadayag nga kahasol sa mga kabanay ni Kienner Baller, 35 anyos nga taga barangay Biasong sa dakbayan sa Talisay nga migunit sa tiil sa dos anyos nga bata ug milambos ngadto sa yuta nga nakaingon sa hinanaling kamatayon.
Ang mga igsoon sa maong suspetsado dali nga miadto sa kapolisan human sa pagkasikop niini ug mipadayag nga maayo unta og dili na gayod kini buhian tungod kay dili na nila maantus ang nasinati nilang kahasol sa drug addict nilang igsoon nga nakahimo pa og grabeng kadaut dihang gipatay ang bata nga ilang silingan.
Daghan ang nag-ingon nga ang gihimo sa maong suspetsado mahimong kabahin lamang sa mga pamilya nga naghambin usab og susamang suliran nga gimugna sa nagumon sa paggamit sa ilegal nga drugas nilang sakop sa pamilya.
Matud pa nila nga magsugod kini dihang ang usa sa ilang sakop sa pamilya maoy atubangon ang pagkuyogkuyog sa mga barkada nga pulos usab adik sa paggamit niini.
Ug kanunay na kining madugay nga mopauli sa ilang panimalay ug mamatikdan nga hilabihan na kabakakon ug dili na gayod masugo bisan sa ginagmay lang nga gimbuhaton sa panimalay.
Magpangayo kini og kuwarta sa mga ginikanan sa bisan unsa na lamang nga pasangil nga panginahanglan apan ang tinuod adto kini paingon sa pagpalit og shabu sanglit dili na man kini mahimutang kun mapakyas sa paghingus niini.
Kun dili na hatagan og kuwarta sa mga ginikanan maoy mamatikdan ang kalit lang nga pagkawagtang sa mga butang sa pamilya, alahas, plantas, electric fan, cellphone ug uban pa nga ikabaligya nga ang halin maoy ipalit og shabu nga hinguson niini.
Dugang pa nila gikan sa ginagmay nga mga butang nga pagpangawat sa sulod sa ilang pamilya kun dili na gayod matabang sa iyang mga ginikanan adto na kini paingon sa dinagko nga pagpangawat ug pagpanulis ug lakip na sa mahasol dili lang ang mga silingan kun dili ang tibuok na gayod katilingban. (Romeo T. Limpangog)