Aniay mga “Modernong Pagya” sa binisaya nga gipada sa Banat News ni Ronie Catadman ug napatik sa maong mantalaan niadtong Septiyembre 8, 1996.
* * *
Basta hapdos pa kaayo ang samad timan-i magtipun-og ang mga panaad, apan kun wala na gani ang mga pag-antos hikalimtan na lang ang mga Santos.
* * *
Ang tawo nga hadlokan lagmit malukapa sa kapakyasan.
* * *
Ang tawo nga hinawayon sa iyang isigkaingon lagmit adunay daghang apan sa iyang kaugalingon.
* * *
Ang tawo nga ampay ang pagkatulog lagmit mosapya ang bukobuko motuskig ang tuhod.
* * *
Matag pamulong sa hambugero bisan asa modaghan ang kontra monihit sab ang higala.
* * *
Ang paghinulsol maoy simbolo sa kagawasan kay bisan unsang hugaw angay man gayod nga pagahugasan.
* * *
Ang tawo nga magpatuga nga maadunahan lagmit motingkagol sa mangitngit nga bilangguan.
* * *
Hikalimti ang tipik sa imong kagahapon ug maoy atubanga ang ugma nga taliabot.
* * *
Ang usa ka halok bisan sa damgo lang hagkot ug tam-is nga mabatyagan.
* * *
Ang matuhotuhoon maoy tawo nga walay salig sa kaugalingon.
* * *
TRIVIA. Maayong buntag sa atong mga higala diha sa Minglanilla labi na sa mga kawani sa munisipyo. Daghang salamat sa inyong suporta sa Banat News.