Kun ang usa ka tawo anaa na sa saktong edad (18 anyos pataas) mamahimo na kining magpakasal. Apan ang atong Family Code nag-require sa kaslonon nga nagpangidaron pa lang og 18 anyos ngadto sa 21 anyos sa pagsumiter og Parental Consent ngadto sa Civil Registrar nga pinirmahan sa ilang ginikanan o guardian ( Art. 14, Family Code). Kun mapakyas sila sa pagsumiter og Parental Consent unsay mamahimong epekto niini sa ilang kaminyoon? Kana nga pangutana ang atong tubagon karon.
Dear Atty Divine,
Maayong adlaw nimo Attorney, duna unta koy ipangutana nimo labot sa problema sa akong ig-agaw. Gikasal siya sa iyang husband nga way Parental Consent ug dinhi sila sa Cebu nagpakasal. Ang babaye 18 anyos pa samtang ang lalaki 19 anyos pa niadtong higayona. Mayor ang nagkasal nila ug wa sila maka-submit og Parental Consent. Karon nagbuwag na sila, ang akong pangutana mao ni: 1. Balido ba ang ilang kasal? 2.Tinuod ba nga valid lang ang ilang kasal sud sa unom (6) lang ka buwan? 3. Pila man diay edad nga magkinahanglan ang kaslonon og Parental Consent? 4. Unsa may angay niyang buhaton aron ma-annul ang ilang kaminyuon kay aduna na may laing kapuyo ang iyang kanhi bana?
Daghan kaayong salamat Atty Divine sa imo paghatag og pagtagad sa akong email magpaabot ko sa imong tubag. God bless you and more power. — Gabby
Dear Gabby,
Kung gikasal sila nga way parental consent nga maoy gilatid sa Art. 14 sa atong Family Code balido kini apan voidable ang ilang kaminyuon meaning pwede kini nga ma-annul basi sa Art. 45 (1) of the Family Code. Silang duha kay pulos man sila way parental consent mamahimo nga mopa-annul sa ilang kaminyuon sa dili pa sila moabot sa edad nga 21 anyos, apan kun pag-abot nila og 21 anyos nagpadayon gihapon sila sa pagpuyo isip magtiayon gikonsiderar na sa atong balaod nga ilang gi-ratify ang ilang kaminyuon kay boluntaryo man gihapon silang nagtipon pag-abot nila sa edad nga 21 anyos busa di na kini nila ma-question.Kanang gisulti sa uban nga good for six (6) months lang ang ilang kaminyuon dili na tinuod, kay ang kaminyuon way expiry date magpabilin kining balido gawas lang kun ang Korte na ang mo-annul niini o modeklarar nga dili balido ang maong kasal. Basi sa atong Family Code, nagkinahanglan og Parental Consent ang magminyo nga nagpangidaron pa lang og 18 anyos ngadto sa 21 anyos. Ang maayo niyang buhaton karon kun gusto siyang ma-annul ang iyang kaminyuon mao ang pagpasaka og petition sa Korte aron ipa-annul o ipa-declare nga void ang iyang kaminyuon. Ang iyang abogado na ang motuon sa iyang mga ebidensya kun unsay iyang grounds nga gamiton sa pagpa-annul o pagpa-declare niini nga void. Bisan kun aduna nay kapuyo ang iyang kanhi bana nagpabiling legal ang ilang kaminyuon hangtud nga di kini ma-annul sa Korte busa dili pa siya mamahimong magpakasal og lain. —Atty. Divine
Ang kaminyuon usa ka special nga kontrata tali sa usa ka babaye ug lalaki. Wa kini expiration date busa lifetime kini nga sudlan sa magtiayon. Sayon ang pagsud sa kaminyuon apan lisud ang paggawas niini kay dili tanang kaminyuon ang mamahimong ma-annul o madeklarar nga void sa Korte. Busa ang tawo nga mosulod niini kinahanglan nga preparado gyud nga mosud sa usa ka lifetime nga commitment isip usa ka asawa o bana ug isip umaabot nga inahan o amahan.
Kun aduna moy pangutana, ipadala lang sa Legal Corner sa Banat News or email sa flores_divina@yahoo.com.