Gitagalan na lamang sa Cebu Port Authority ang Bureau of Customs Port of Cebu og kutob sa 60 ka adlaw sa ilang pagpuyo sa pier 6 sugod niadtong miaging semana diin nadawat niini ang gihatag nga ultimaora.
Tungod niini nagkaproblema ang nahisgutang buhatan tungod kay wala pa silay kabalhinan nga lugar ug ang 60 ka adlaw dili usab igo nga panahon sa pagpangbalhin sa ilang mga kagamitan ug mga ekipos.
Sa akong pagpakighinabi ni Atty. Ronnie Silvestre, Collector sa Bureau of Customs sa Port of Cebu iyang giingon nga kun ugaling dili sila makapangita og lugar nga kabalhinan hayan magtolda na lamang sila diha sa pier area aron ilang mapadayon ang pagpangolekta og buhis ug pag-alagad sa ilang mga kliyente bisan pa man sa ilang kahimtang. Hinoon iya nang napahibawo ang buhatan ni Customs Commissioner Ruffy Biazon ug nagpaabot na lang siya sa lakang nga himoon niini mahitungod sa ilang suliran.
Manghinaot lang ko nga mahonghungan ni Commissioner Ruffy Biazon si Pangulong Noynoy Aquino mahitungod sa suliran nga nasugatan sa iyang buhatan sa Port of Cebu kay nahimo man ni ron siyang ikog sa pangulo kay kun asa ang pangulo toa man usab siya kay nagpaila-ila na sa mga tawo kay nangambisyon nga mag senador.
Ang Bureau of Customs sa Port of Cebu adunay iyang kaugalingong building o buhatan apan gikuha kini ni kanhi pangulong Gloria Macapagal Arroyo kay gihimong Malakanyang of the South sa panahon sa iyang administrasyon busa napugos sa pagbalhin ang Bureau of Customs ngadto sa building ug luna nga gipanag-iya sa Cebu Port Authority kinsa giingong gusto na usab nga mogamit niini.
Ang Malakanyang sa Sugbo wala na magamit sukad milingkod isip pangulo sa nasud si Pangulong Noynoy Aquino busa naglaraw ang Bureau of Customs sa pagbalik sa building nga ilang gipanag-iya apan gibabagan sila tungod kay giplanohan nga himoong museum ang Malakanyang sa Sugbo. Mao na ni ron. Ning panahona kinahanglan nang mamili si Pangulong Noynoy Aquino: Ihatag ba niya og balik ngadto sa Bureau of Customs ang ilang building aron dili mabalda ang ilang pagpangolekta og buhis para sa gobyerno o pasagdan lamang sa pangulo ang nahisgotang buhatan nga magkalisod-lisod tungod ug alang sa gipalabi niining museum.