Ang plebisito nga gipahigayon niadtong Sabado sa barangay Guadalupe maoy usa ka tataw kaayong sukdanan nga ang katawhan sa maong lugar way gusto nga mabungkag sila.
Di usab sila angay basulon tungod kay ang ilang mentalidad lahi man sa utok sa mga tawong may liderato, busa natural unsay naandan nila , aw mao nay ilang pakamatyan.
Ang kapitan sa Guadalupe mas dako pa og atimanonon kay sa usa ka mayor sa lungsod nga dyutay ra og barangay.
Kay ang Guadalupe may 84 ka sitio, ug sa usa ka lider sama kang Cong. Antonio Cuenco nga nakaamgo nga ang kadaghan sa maong mga sitio, di kalikayan ang higayon nga may mga sitio niini nga di na maatiman sa kapitan, miabot sa iyang hunahuna nga angay kining bungkagon pinaagi sa plebisito.
Nalantawan ni Cuenco nga sama ra sa usa ka amahan nga daghan og anak, nga gumikan kay nagtupongtupong lang ang anak makalimot na sa mga ngalan sa iyang anak. Sa naandang sukdanan pangliderato, kaantigo kini motan-aw unsaon pagpagaan sa usa ka bug-at nga butang, ug kini mahimo kaayong pinaagi sa pagbuwag-buwag ngadto sa ginagmay aron sayon na lang ang pagpas-an o pagdumala niini.
Sama sa usa ka dakong putos nga aron mogaan, usa ka elementarya kaayong sistema ang angay sagupon, nga mao ang pagbungkag sa maong putos ug mogaan na kini, dali rang mapas-an kay mahimo mang daghan ang makapas-an.
Busa karon nga namatud-an nga wa mosaler ang plebisito, mas maayo tingale nga ang konseho sa siyudad maoy mangita og paagi kun gusto nga ang ubang bahin sa Guadalupe, mapas-an og laing mga opisyal nga makadominar sa ilang kaugalingong lugar.
Ang pagpatuman sa "division of labor " angay bayang sagupon sa mga pamunoan sa syudad kun nag-apas kini nga kakuhaan ang gipas-an sa kapitan sa Guadalupe.
Kay anha man gud magsukad ang kahinay sa liderato sa usa ka kapitan kun sa kadako na sa iyang area of responsibility maglisud na siya sa paggahin og panahon aron masuroy niya ug kahatagan og patas nga pag-atiman ang tanang sitio sa maong barangay. Di ba?