Nahimo nga gamay’ng “swimming pool” sa mga bata nga libudsuroy ang sapa diri kilid sa Gaisano Main nga duol ra usab sa among opisina sa The Freeman. Mga unom ngadto sa pito ka bata ang kanunay’ng maligo sa maong sapa.
Milawom na man gud og gamay ang sapa human nga gihaw-asan kini sa mga lapok sa kontraktor nga gi-hire sa City Hall. Apan diha ra usab nga dapita kay daplin man og karsada, sa unahan mabaw gihapon.
Kaniadto mabaw na gayud kaayo ang maong sapa nga masangit na gani ang mga sagbot ug hugaw pa kaayo ang tubig.
Dili ba kana mahugaw nga ang mga tubig gikan sa mga tindahan, mga ihi gikan sa mga tindera sa department stores, anha man diha paingon. Apan gibaliwala ra kini sa maong mga bata nga panagsa ra lagi makaligo og linaw.
Awhag nako sa mga opisyal sa Department of Engineering and Public Works (DEPW) nga superbisahe gayud ninyo pag-ayo ang “ongoing dredging” sa kasapaan kay aron dili kita mabinuangan lang sa mga gikuha nato nga kontraktor.
Gikuyawan man gud ko nga ang ilang limpyohan mao ra ang daplin sa karsada nga makita sa mga tawo, apan sa hilit na nga dapit dili nila atimanon. Sama sa ubos niini nga bahin sa Parian Creek, wala pa man nila kuhai og mga lapok.
Sa ako lagi nga pagtimbang-timbang, kun hingpit lang nga mapalawman ang maong sapa, dili na kaayo maglunop ang downtown area kun dunay uwan, gawas lang tingali kun kusog na kaayo ang uwan.
Hagit nako kang City Engineer Kenneth Carmelita Enriquez nga pabantayan gayud niya sa iyang mga sakop ang ongoing dredging. Kini ra ba si Kenneth dili ra ba gayud motubag kun imong teksan ug bisan pa og tawgon.
Mamili tingali ni siya og ang motawag niya pareho niya nga milyonaryo.
* * *
May blessing na ni Presidente Aquino kagahapon ang pagtandem nila ni Junjun Davide ug Agnes Magpale pagka gobernador ug bise gobernador sa eleksyon karong sunod tuig.
Si Davide ug Kongresista Pablo John Garcia ang magsangka pagka gobernador. Sa bisi, wala pa mahibaw-i kinsa ang ikaparang ni Magpale. Timan-i nga si Davide napilde ni Gobernador Gwen sa eleksyon adtong 2010 kay daku siya og botos sa fifth district.
Makapaikag ang kalamboan sa politika. Ang Philippine Star may balita nga maghiusa kuno ang tulo ka dagkong partido – ang Nacionalista, Liberal Party ug Nationalist People’s Coalition (NPC).
Magtampo-tampo sila og mga kandidato nga iparang nila sa mga padaganon sa grupo ni Vice President Jejomar Binay, ang United Nationalist Alliance.
Sa NPC, ang tulo nga posible nga maapil sa common slate mao sila si Senador Francis Escudero, Loren Legarda ug ang mayor sa Valenzuela City nga si Sherwin Gatchalian.
Aw kini hinoon si Mayor Gatchalian, daghan kini og mga maayo nga proyekto didto sa Valenzuela City nga ang uban gani gisundog sa ubang local government units. Haum si Gatchalian nga mahimong senador.
Husto ang plano nga maghugpong sa ilang kusog ang tulo ka partido aron mosamot sila kalig-on. Sa NP, ang posible nga kandidato mao sila si senators Alan Peter Cayetano, Antonio Trillanes IV ug si kanhi Las Piñas City Congressman Cynthia Villar.
Ang ubang kandidato, adto kuhaon sa LP.