(Dihay nars gisugo sa doktor pagbutang og rectal thermometer sa pasiyente)
Dr. Bitoy: O Senyang nataod na nimo ang termometer sa sampot sa pasyente?
Senyang: Yes Dok ako pa.....
Dr. Bitoy: Unya nganong naa pa man na sa imong dunggan?
Senyang: Oy hala! asa man diay akong ballpen Dok?
Dr. Bitoy: Patay! (Toink!/Aguy!) Hehehehehehehehehe!
Makalingaw kun komedya lang apan kun tinuod ang maong bulilyaso ingon lang kaha kasayon sa pagpakatawa ang pagpasabot sa posebling hingtungdan?
Duna karoy pamilya sa Dakbayan sa Talisay nga nagbangotan ug nagpaninggit og hustisya sa gidangatan sa ilang 4 anyos nga bata. Namatay ang bata sa sakit nga dengue duha na ka semana ang nakalabay.
Dili man sa tawo ang gimbut-an sa kamatayon apan nahasol pag-ayo ang pamilya sa bata tungod kay alang nila nasayop ang doktor paghiling sa pasiyente nga maoy naingnan sa hinanaling pagtaliwan.
Urinary Tract Infection kon UTI ang resulta sa paghiling sa doktor sa Talisay District Hospital sa hilanat sa bata. Apan dihang gipainum na sa apohan og Antibiotic nilagom ang bata gitabang, gidala pagbalik sa District gibalhin sa Don Vicente Sotto apan wala na gyud maluwas ang bata. Sumala sa laboratory result sa District Hospital nga gihuptan sa pamilya taas ang platelet count sa bata, apan human nila paimna og tambal giatake ang bata ug matud pa sa doktor sa Vicente Sotto dengue ang naingnan sa kamatayon.
Buot karon ang pamilya nga mangayo og hustisya sa kamatayon sa bata. Kombinsido sila nga ang antibiotic para sa UTI maoy nakakablit pag-atake sa dengue nga wala dayon madiskobrehe sa mga tinugyanan sa tambalanan sa unang paghiling.
Ang pangutana duna bay tulobagon ang doktor nga unang naghiling sa bata? Kun dili mamatikdan dayon sa doktor ang sakit sa pasiyente ug mahatagan og tambal sa laing komplikasyon nga iyang nakit-an nga maingnan sa disgrasya duna bay kalapasan ang mananambal?
Buot karon sa pamilya nga mapatawag ang doktor sa Ombudsman o kaha mapasakaan og kasong kriminal. Nagpatabang karon ang pamilya sa komitiba ni Konsehal Choy Aznar aron mahikay ang ilang plano pagpangayo og hustisya. Tinuod nga natong mga yanong tawo dunay mga proseso o komplikasyon sa panglawas nga dili nato masabtan nga ang mga doktor lang ang nasayud. Ilabi na sa sakit nga dengue nga dili dayon madiskitaan kun pabiling taas ang platelet count sa pasiyente.
Apan mabasol ba ang hingtungdan nga mokisikisi kun ang sakit nga unang napahibawo sa naghiling nga doktor dili motakdo sa sakit nga maingnan sa kapildihan sa pasiyente?
Infairness sa doktor nga hingtungdan dili una nato mahisgotan ang iyang ngalan tungod kay wala pa man nato makuha ang iyang habig.
Apan kun palapdan nato ang paghisgot sa mga ingon ini nga komplikasyon pila na kaha tinuod no ang mga ingon ini nga sitwasyon apan giutong lang sa mga hingtungdan? Hinuon siguro talagsa lang mahitabo ang mga ingon ini nga sitwasyon o kaha mahimo sab nga wala na lang moreklamo ang hingtungdan kay wala say ikasarang pagreklamo.
Kinahanglang susihon ni sa kagamhanan sa Dakbayan sa Talisay. Ining paagiha mapanalipdan sa Talisay District Hospital ang kaligdong ug kahanas pag-atiman sa mga pasiyente ug labaw sa tanan kapanalipdan ang mga magbubuhis sa Siyudad kun tinuod man nga dunay pagpabaya ang mananambal sa Distritong Tambalanan. Ang sipyat sa pagtambal wala gyuy problema kun ingon ini lang ang mahitabo.
Siana: Nay si Lola baya gihilantan ganina nagkurog gud.
Senyang: Oy mao ba unya anak asa naman si Lola mo.
Siana: Nanglaba na abtik na kaayo kay ako man gipainom og tambal.
Senyang: Ha! Unsa mang tambala ang imong gipainom oy kamao diay ka.
Siana: Nagkuha lang ko atong imong gikuhaan sa tambal ni Tatay.
Senyang: Ang hain ato ang puti nga plastik?
Siana: Dili ang pula.
Senyang: Sus Ginoo ko dili to tambal sa tawo, vitracin multicaps to
(Toink!/Aguy!) Hehehehehe! (emailad:jomar_bellita@yahoo.com)